Piać faktaŭ pra dziaržsakratara Rady biaśpieki Alaksandra Miažujeva

Alaksandr Miažujeŭ staŭ novym dziaržaŭnym sakratarom Rady biaśpieki. «NN» sabrała cikavyja fakty pra siłavika.

Ažaniŭsia ŭ 19 hadoŭ

Miažujeŭ naradziŭsia ŭ 1959-m u Lachavičach. Adukacyju, jak i bolšaść vajskoŭcaŭ, atrymlivaŭ za miežami Biełarusi. Skončyŭ Kijeŭskaje vyšejšaje ahulnavajskovaje kamandnaje vučylišča, Vajskovuju akademiju imia Frunze ŭ Maskvie, a taksama Vajskovuju akademiju hienieralnaha štaba Uzbrojenych siłaŭ Rasijskaj Fiederacyi. U zvańni hienierał-majora.

Prachodziŭ słužbu ŭ kamandnych i štabnych pasadach: kamandzira bryhady, namieśnika kamandujučaha vojskami apieratyŭnaha kamandavańnia, načalnika štaba — pieršaha namieśnika kamandujučaha apieratyŭnaha kamandavańnia, kamandujučaha vojskami apieratyŭnaha kamandavańnia, načalnika Hałoŭnaj vajennaj inśpiekcyi Uzbrojenych sił Respubliki Biełaruś.

Žaniŭsia ŭ 19 hadoŭ, maje troch synoŭ (usie adsłužyli ŭ vojsku). Kazaŭ, što tak rana žaniŭsia, bo bajaŭsia ssyłki ŭ addaleny harnizon paśla vučoby. Žonka była ź im paŭsiul.

«Nie kamanduje, ale kiruje ŭ chatniaj haspadarcy žonka, ja joj całkam daviaraju», — kazaŭ Miažujeŭ u adnym ź intervju.

Samy vialiki prybytak

Deputatam pałaty pradstaŭnikoŭ Miažujeŭ byŭ abrany pa 52-j vybarčaj akruzie ŭ Hrodna. Akruha była biezalternatyŭnaj.

Samaje cikavaje, što Miažujeŭ byŭ samym bahatym kandydatam u deputaty. Jahony prybytak za hod pierad vybarami skłaŭ 33 tysiačy dalaraŭ.

Jaho supiernikam u akruzie moh być namieśnik staršyni Partyi BNF Alaksandr Stralcoŭ-Karvacki, ale arhanizacyja pryniała rašeńnie źniać svaich kandydataŭ z vybaraŭ.

U pałacie pradstaŭnikoŭ Miažujeŭ uznačalvaŭ kamisiju pa nacyjanalnaj biaśpiecy.

Były padnačaleny Valeryja Frałova

«Heta moj były padnačaleny, — kaža hienierał Valeryj Frałoŭ. — Niekali jamu navat pa-za čarhoj prysvoili zvańnie pałkoŭnika. Vielmi prafiesijna padrychtavany čałaviek, prystojny. Nie viedaju, jak jon ciapier, a raniej u mianie zastavalisia ad jaho samyja najlepšyja ŭražańni. Ale zdarajecca, što žyćcio łamaje maich byłych siabroŭ. Nie bačać jany ŭ sabie siłaŭ, kab niešta źmianić u krainie.

Jon niekali, zdajecca, u 97-ym, kiravaŭ likvidacyjaj nastupstvaŭ urahana ŭ Bresckaj vobłaści. Pamiataju, što niekali da nas pryjazdžali amierykancy, my da ich jeździli, jany da nas, dyk Malcaŭ [były ministr abarony – «NN»] adpraviŭ ich u Brest da mianie. Miažujeŭ tady vydatny arhanizavaŭ pryjom, naviedvańnie Bresckaj krepaści, inšyja bytavyja momanty. Amierykancy byli vielmi zadavolenyja».

Suprać vojska pa kantrakcie i skaračeńnia terminu słužby

«Biełaruś znachodzicca na parozie vajny? Abo ŭ joj pracent niestatutnych adnosin vialiki, abo vialiki pracent maładoha papaŭnieńnia pamiraje ad prastudnych zachvorvańniaŭ? Abo my pasyłajem nieabučanych sałdat u haračyja punkty śvietu?» — rytaryčna pytaŭsia Miažujeŭ na kruhłym stale pa pytańniach vojska.

Miažujeŭ kazaŭ, što Niamieččyna, pierajšoŭšy na kantraktnaje vojska, straciła ŭ svajoj abaronazdolnaści, bo na kantrakt u asnoŭnym iduć inšaziemcy dziela hrošaj i vidu na žycharstva.

Taksama hienierał raskrytykavaŭ źmianšeńnie terminu słužby z paŭtara hoda da hoda. Tym samym, chutčej zaśviedčyŭ siabie jak kansiervatar. Vykazvaŭ zakłapočanaść «aktyŭnaściu» NATO na miažy ź Biełaruśsiu.

Jašče budučy kamandujučym Zachodniaha apieratyŭnaha kamandvańnia Miažujevu daviałosia adkazvać, čamu vajskoŭcy chodziać u «kirzačach».

«Staptali toje, što było, kab nie vykidvać. Ciapier pierachodzim na «biercy» zamiest botaŭ. My pravodzim płanamiernuju pracu pa abnaŭleńni sałdackaj vopratki», — prahmatyčna tłumačyŭ tady jon.

«Žančyna — heta ŭzorny voin»

Adnojčy ŭ Miažujeva papytalisia ab staŭleńni da žančyn u vojsku. Voś taki byŭ adkaz: «Ja vam tak skažu: žančyna — heta ŭzorny voin. Jana nie parušaje vajskovuju dyscyplinu, dobrasumlenna stavicca da vykanańnia słužbovych abaviazkaŭ, joj nie treba paŭtarać dvojčy. Žančyna pjanaja za rulom nie jeździć, u niećviarozym stanie ŭ hramadskich miescach, jak praviła, nie źjaŭlajecca. Pry hetym jana jašče i siamju ŭtrymlivaje. Tak što tut usio zakanamierna».

Svaim chobi Miažujeŭ nazyvaje sport. Kaža, što ŭsurjoz zajmaŭsia handbołam, dziuda, hirami, a ciapier kožny čaćvier chodzić u basiejn.

Ad listapada Alaksandr Miažujeŭ źjaŭlajecca kiraŭnikom Biełaruskaha sajuza aficeraŭ.

• 0
• 0
• 0
• 0
• 0
• 0
• 0
• 0