Batura nie vyjšaŭ na pracu ŭ «Barysaŭdrevie», choć jamu pahražali kryminałkaj

Hienieralnym dyrektaram AAT «Barysaŭdreŭ» pa-raniejšamu zastajecca Uładzimir Malcaŭ.

«Zdajecca, hienieralnym dyrektaram AAT «Barysaŭdreŭ» zastaŭsia Malcaŭ», — paviedamili ŭ kancernie «Biellespapierapram».

Krynica va ŭradzie paćvierdziła, što rašeńnia ab zvalnieńni Uładzimira Malcava nie było.

Były staršynia Minabłvykankama 66-hadovy Barys Batura, jakomu Alaksandr Łukašenka zahadaŭ zaniać pasadu hiendyrektara AAT «Barysaŭdreŭ», na pracu na hetaj pasadzie nie vychodziŭ i pakul naohuł nie płanuje šukać novuju pracu. Treba adznačyć, što zhodna z zakonam Biełarusi ab dziaržsłužačych, hraničny ŭzrost ich znachodžańnia na dziaržsłužbie składaje 65 hadoŭ. Adnak heta nie tyčycca dziaržsłužačych, uklučanych u kadravy rejestr kiraŭnika dziaržavy. Ź ich zhody jany mohuć zastavacca na dziaržaŭnaj słužbie ŭ paradku, ustanoŭlenym prezidentam.

Zvolnić Baturu z pasady staršyni Minskaha abłasnoha vykanaŭčaha kamiteta kiraŭnik dziaržavy rasparadziŭsia 8 listapada, padčas naviedvańnia AAT «Barysaŭdreŭ».

Tady Alaksandr Łukašenka žorstka raskrytykavaŭ urad i svaju administracyju ŭ suviazi ź situacyjaj u drevaapracoŭčaj pramysłovaści, a taksama rasparadziŭsia zrabić šerah kadravych pierastanovak.

«Baturu adchilić ad pasady i nakiravać siudy kiraŭnikom. Kali praz try dni nie vyjdzie na pracu, raspačać pa im kryminalnuju spravu», — zajaviŭ kiraŭnik dziaržavy. 

U toj ža dzień byŭ padpisany ŭkaz prezidenta № 502 «Ab adkaznaści za parušeńnie vykanalnickaj dyscypliny». Zhodna z dakumientam, «za nienaležnaje vykanańnie daručeńniaŭ prezidenta Biełarusi pa madernizacyi vytvorčaści AAT «Barysaŭdreŭ» Barys Batura vyzvaleny ad pasady staršyni Minskaha abłvykankama». 

Va ŭkazie ničoha nie skazana pra zvalnieńnie hienieralnaha dyrektara AAT «Barysaŭdreŭ» i pryznačeńni novaha.

Sam Batura ŭ intervju radyjo «Svaboda» ŭ aŭtorak skazaŭ: «Ja piensijanier i budu ciapier adpačyvać».

Na pytańnie karespandenta: «Ale ž Vam skazali pryjści na «Barysaŭdreŭ» i pracavać dyrektaram» — Batura adkazaŭ:

— «Nu niama takoha. Va ŭsiakim razie va ŭkazie».

Karespandent: «Ale ž Łukašenka skazaŭ Vam pryjści i praz try dni pracavać na «Barysaŭdrevie»…

Batura: «Ja pakul adpačyvaju».

Karespandent: «A što tam Vam pahražali, što raspačnuć kryminalnuju spravu, pad sud addaduć, što jość niejkija padstavy?».

Batura: «Nu addaduć, dyk addaduć. My ludzi padniavolnyja, nie nadta dobra siabie adčuvajem».

• 0
• 0
• 0
• 0
• 0
• 0
• 0
• 0