«28 tydniaŭ paśla»
Žudasnaja fantastyka Chuana Karłasa Fresnadyljo pieraŭzychodzić aryhinał Deni Bojła…
28 tydniaŭ paśla (28 Weeks Later)
Vialikabrytani, 2007, kalarovy, 99 chv.
Režyser: Chuan Karłas Fresnadyljo
Roli vykonvajuć: Robert Karłajł, Roz Birn, Džeremi Rener, Amanda Ŭokier, Šachid Achmied, Harald Peryna, Ketryn MakKormek, Harfiłd Morhan
Žanr: Postapakaliptyčny zombi-film
Adznaka: 8,5 (z 10)
Paśla epidemii šalonstva, jakoje pieraŭtvaraje ludziej u zombi, Brytanija spustošanaja. Praz 28 tydniaŭ infikavanyja zahinuli ad hoładu – i na vyspu vysadžvajucca vojski NATA. Ichniaja meta – spryjać zvarotnaj kalanizacyi vostravu.
Repatryjanty viartajucca ŭ Londan. Siarod prybyłych – dzieci hałoŭnaha hieroja (Robert Karłajł), jaki vyratavaŭsia, kinuŭšy žonku kryvažernym šaloncam. Epidemija spyniłasia, ale virus nia źniščany. Jon vierniecca ŭ śviet praź źniaviečanuju siamju…
Praciah katastrafičnaha zombi-filmu Deni Bojła “28 dzion paśla” atrymaŭsia nia horšym za aryhinał. Režyser Chuan Karłas Fresnadyljo, jaki zaśviaciŭsia z małaviadomym, ale stylnym trymcieńnikam “Intakta”, pavialičyŭ maštab katastrofy j uzmacniŭ dynamiku.
Pusty Londan, jaki pałochaŭ hledačoŭ u “28 dniach” ciapier trucicca hazami, bambujecca avijacyjaj i rasstrelvajecca snajperami. Scena, kali vajennyja źniščajuć mirnych kalanistaŭ – usich zapar i zdarovych, i chvorych – stajecca metafaraj terarystyčnaha vieku, zalimitnym kašmaram vajny, jakaja pałychaje ŭ Iraku i jakaja pryjšła na zachodniuju terytoryju.
Pseŭdadakumentalnyja kadry, dryhotkaja kamera, ciomnaje metro z zahibłymi, aśvietlenaje snajperskaj vintoŭkaj; chrypy j kryk, fantančyki kryvi ad razryŭnych kulaŭ…. I chto ciapier strašniejšy, žyvyja ci miortvyja? Masavyja sceny – udarnyja atrakcyjony Fresnadyljo: panika ŭ sutareńniach, hielikter, jaki vintami raśsiakaje zhraju zombi, masavyja ŭcioki. Žyvyja ŭciakajuć ad žyvych – bo dadzieny zahad na źniščeńnie; žyvych pieraśledujuć raźjatranyja trupy.
Ale masavaja katastrofa pačynajecca ź siamji, sa zdrady j bojazi. Robert Karłajł nie sastupaje hieroju “28 dzion” – Kilijanu Merfi – i pryŭnosić dośvied ułasnych rolaŭ. Jahony persanaž – heta j ludažer (“Hałodny”), i Hitler (“Hitler: Paŭstańnie zła”) – i praletar, jaki šukaje haniebnuju pracu (“Poŭnaje ahaleńnie”).
Nievynosna strašny film dla ŭdumlivaha prahladu.
Ciapier čytajuć
Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?9
Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju3232
Kamientary