Čytačy «NN» prapanujuć akcyi pratestu

Čutki pra vyklučeńnie «NN» z padpisnoha katalohu na pieršaje paŭhodździe 2006 h. vyklikali chvalu čytackich vodhukaŭ na našym internet-forumie. Čytačka Śviatłana napisała: «Ja pryvykła štočaćvier iści ŭ šapik pa «NN» — heta adzin z elementaŭ majho asabistaha ščaścia. Nijakija taŭstamiasyja idyjoty nia mohuć leźci ŭ moj śviet i zabirać maju hazetu».

Niamała prapanovaŭ pryjšło nakont mahčymaściaŭ dalejšaha raspaŭsiudu. Jany buduć u razie patreby ŭsie ŭličanyja.

Čytač, jaki prykryŭsia pseŭdanimam «PDF nas vyratue», prapanavaŭ nia tolki varyjant raspaŭsiudu, ale i svaju dapamohu: «Ja zhodny zapłacić za «NN» u PDF i razdrukoŭvać jaje na svajoj drukarcy biaspłatna nakładam da 50 štuk i dasyłać pa pošcie ŭ luby rehijon Biełarusi. Ad achvotnych atrymlivać hazetu takim čynam spatrebicca tolki apłacić paštovyja pasłuhi na rassyłku. Adna techničnaja prablema — pryjdziecca viarstać hazetu tak, kab jaje razdrukoŭvać na A4. Kali takich ludziej znojdziecca chacia b 100, minimum 5000 hazetaŭ budzie raspaŭsiudžana».

Čytač akuj padsumoŭvaje: «Pra rassyłku — viadoma ž, heta žorstka zvuzić aŭdytoryju, ale heta varyjant važny va ŭmovach abłohi i infarmacyjnaha hoładu. Heta budzie realny klub, a heta zmoža skansalidavać čytackuju aŭdytoryju. Ciapier — čas vyznačycca: ja z «NN» ci nie, i na što ja zdolny pajści? Adnačasova vyznačycca: «NN» — heta tolki hazeta ci niešta bolšaje? Pra siabie skažu: budu imknucca atrymać Vas u takim farmacie, u jakim heta tolki budzie dasiahalna».

Čytačy taksama horača vystupajuć za praviadzieńnie akcyjaŭ pratestu ŭ vypadku zabarony. Hetak, čytačka Śviatłana prapanuje: «Čytačam Nivy treba sabracca i z hazetaju ŭ rukach pryjści ŭ hałoŭny ofis «Biełpošty». Stać tam i maŭkliva čytać hazetu. Paralizavać im pracu. Nas tysiačy, i my dobryja hramadzianie hetaj krainy, niama čaho dazvalać zhniuščacca z našych intelektoŭnych patrebaŭ». «Zabiaruć i adpuściać, — padtrymlivaje ideju pra akcyi pratestu Hedymin. — Ichnaj hałoŭnaj zadačaj źjaŭlajecca praduchileńnie hramadzkaj ahałoski. A aryšty mohuć pryvieści da jašče bolšych akcyjaŭ pratestu».

My razhledzim hetyja prapanovy.

Čytač «Nas vyratue PDF» prapanavaŭ cisnuć na «Biełpoštu» nia tolki z hetaha, ale i z taho boku dziaržaŭnaj miažy: «Dobra było b paprasić Eŭraźviaz zabaranić ujezd u jaho miežy adkaznym čynoŭnikam «Biełpošty», jakija farmalna pryniali hetyja rašeńni. Niachaj adpačyvajuć na Naračy».

A «Aburany» adhuknuŭsia vieršam:

Vy ŭmiejecie tolki dušyć i rezać,

U skrajnim razie — pinać nahoj.

Ja nie zabudu, tavaryš cenzar,

na zabaronu słova majho.

Ja nia z kamieniu, nie z žaleza —

Mianie, napeŭna, lohka zabić,

Ale... Ja nie zabudu, tavaryš cenzar,

I vam nia dam pra heta zabyć!

Dziakujem usim, chto vykazaŭ nam padtrymku.

Padpisčyki i raspaŭsiudniki mohuć pakidać svaje adrasy abo na Internet-forumie, abo dasyłać na e-mail: [email protected], abo na zvyčajny paštovy adras.

• 0
• 0
• 0
• 0
• 0
• 0
• 0
• 0