Jak siłaviki na čale z Karpiankovym kryšavali narkahandlaroŭ i zastalisia biespakaranymi

U 2014 hodzie, kali ŭ Rasii likvidavali RUBAZ — anałah HUBAZiKa, biełaruskija siłaviki vyrašyli ŭziać z kaleh prykład, i ŭ padraździaleńnie Karpiankova nalacieli z pravierkami. Abhruntavali heta tym, što jano dublavała inšyja viedamstvy. 

Pad pahrozaj skasavańnia HUBAZiKa, jaho načalnik Mikałaj Karpiankoŭ inicyjavaŭ «makavuju spravu» — hučny praces z masavymi zatrymańniami, zasnavanymi na sumnieŭnaj jurydyčnaj padstavie.

Jak piša «Biuro», siłaviki i sudy prosta damovilisia (suprać zakonu) kvalifikavać raspaŭsiud bubak jak kryminalnaje złačynstva.

Na dziasiatki čałaviek paviesili kryminałki za, pa sutnaści, administracyjnyja pravaparušeńni — pa damoŭlenaści pamiž siłavymi strukturami i sudami, u abychod biełaruskaha zakanadaŭstva i kanviencyi AAN. Usio dziela hučnaha pracesu, jaki moh by dadać słužbovych ačkoŭ Karpiankovu. Rezanans ža ihraŭ na ruku nie tolki HUBAZiKu, ale i inšym datyčnym — Śledčamu kamitetu i Hienprakuratury.

«My ŭvažliva vyvučyli pratakoły i vyśvietlili, što bolšaść abvinavačvanych pracavali ŭ asobnych nievialikich hrupach, handlavali ŭ razdrob i nie byli znajomyja adzin z adnym. Tak, u ich mielisia ahulnyja hurtaviki — ale i ź inšymi pastaŭščykami jany taksama pracavali. Heta ŭsio adno što abvinavacić u zmovie ŭsich, chto kuplaje chleb u adnoj kramie», — pišuć rasśledavalniki.

Abvinavačanyja na dopytach raskazvali, što ich kryšavali kankretnyja siłaviki — śledčy ŭ adstaŭcy Anatol Mazulenia (mianuška Ivanyč), namieśnik načalnika ŭpraŭleńnia pa narkakantroli i supraćdziejańni handlu ludźmi MUS Alaksiej Makuryn, supracoŭniki narkakantrolu Dzianis Valantovič, Pavieł Čačotka i inšyja.

«Treba było płacić za kožny rajon, kab nie pryciahvacca da administracyjnaj adkaznaści», — tłumačyŭ fihurant «makavaj spravy» na dopycie.

Inšy abvinavačvany raskazaŭ, što padpałkoŭnik Mazulenia dapamahaŭ z pryvozam bubak u Biełaruś i ich mytnym afarmleńniem na miažy. Za kožny ŭviezieny kiłahram jamu nibyta płacili pa dołary. Tak Mazulenia zarabiŭ jašče minimum 20 tys. dołaraŭ.

Z pakazańniaŭ abvinavačanych taksama vynikaje, što z dapamohaj Mazuleni jany prybirali z rynku kankurentaŭ. Znachodzili kropki, u jakich inšyja handlary zachoŭvali i zbyvali mak, i pieradavali źviestki Mazuleniu. Jon paviedamlaŭ ich znajomym milicyjanieram, a tyja ładzili abłavy. 

Adzin z handlaroŭ acaniŭ košt milicejskich pasłuh Mazuleni ŭ 350 tysiač dołaraŭ. Asnoŭnuju častku hetych hrošaj Mazulenia pieradavaŭ dziejnym siłavikam za «spryjańnie» narkadziałkam.

Akramia hrošaj, milicyjaniery atrymlivali padarunki i roznyja pieravahi, uklučajučy premii za raskrytyja złačynstvy.

Padčas rasśledavańnia padpałkoŭnika ŭ adstaŭcy Anatola Mazuleniu zatrymali i dapytali. Jon admaŭlaŭ svajo dačynieńnie, ale pryznaŭ, što bolš za 20 hadoŭ tavaryšuje ź Iharam Sabaleŭskim — hałoŭnym fihurantam «makavaj spravy». Paśla hetaha Ivanyča adpuścili biez vystaŭleńnia abvinavačańniaŭ. Pierad sudom jon tak i nie paŭstaŭ.

A voś Natalli Karalovaj pašancavała mienš, čym kaleham. U 2018 hodzie jaje, na toj momant staršuju śledčuju Kastryčnickaha rajonnaha adździeła SK, vyklikali na dopyt.

Pryčynaj stali pakazańni adnaho z abvinavačvanych.

Jon śćviardžaŭ, što jaho pamahaty mieŭ z Natallaj ramantyčnyja stasunki. Jana navat nibyta prysutničała pry fasoŭcy bubak na arandavanaj kvatery kachanka. Taja ŭsio admaŭlała. Abvinavačvańnia Natalli nie vystavili.

Čamu nichto nie byŭ pakarany

Usie pakazańni, jakija tyčylisia siłavikoŭ, byli praihnaravanyja. Spravy suprać ich nie raspačynali, telefony nie prasłuchoŭvali, mnohija praciahnuli słužbu i navat pajšli na pavyšeńnie. 

U materyjałach spravy byli źviestki, što častku chabaru atrymlivaŭ i sam Karpiankoŭ — nibyta kala 110 tysiač dołaraŭ. Adzin z abvinavačvanych na dopycie śćviardžaŭ, što Karpiankoŭ stajaŭ na viaršyni piramidy raźmierkavańnia vypłat za «kryšu».

Pavialičyć

Žurnalist «Biuro» patelefanavaŭ Mikałaju Karpiankovu, kab uziać u jaho kamientar pra «makavuju spravu». Toj adkazaŭ krykam:

«Što ty za ch..niu niejkuju niasieš? Zatknisia, b..ć! Što ty za daŭ..iob? Adkul ty ŭziaŭsia, b..ć? Za «kryšu» chabar, b..ć! Idzi na ch..j!»

«Biuro» piša, što paśla «makavaj spravy» karjera Karpiankova visieła na vałasku. Zdavałasia, mahčymaściaŭ dla manieŭru ŭžo nie zastałosia. Adnak u 2020 hodzie zdaryłasia niepradbačanaje: u Biełarusi vybuchnuli pratesty, i režymu terminova spatrebilisia tyja samyja «biazhłuzdyja ludzi», hatovyja na lubuju žorstkaść. Karpiankoŭ apynuŭsia ŭ pieršych šerahach. Patapiŭšy vulicy Minska ŭ hvałcie i kryvi, jon narešcie atrymaŭ žadanaje — uładu. 

Jak i pratestoŭcy ŭ 2020 hodzie, abvinavačvanyja pa «makavaj spravie» stali achviarami ambicyj Karpiankova.

Bolš padrabiazna rasśledavańnie čytajcie tut. 

• 4
• 0
• 5
• 10
• 1
• 0
• 28
• 0