U Minsku značna vyraśli taryfy na evakuacyju aŭtamabila i štrafstajanku
Minskija ŭłady padniali taryfy na evakuacyju transpartnych srodkaŭ na štrafstajanku. Vyraśli taksama rascenki na zachoŭvańnie adbuksiravanaha aŭtamabila na achoŭvajemaj stajancy. Kolki ciapier daviadziecca płacić parušalnikam pravił parkoŭki dadatkova da štrafaŭ DAI, vyvučyŭ Telegraf.news.
Rašeńnie staličnych uładaŭ ad 12 červienia 2025 hoda było aficyjna apublikavana na Nacyjanalnym pravavym internet-partale 24 červienia, a značyć, užo z 25 červienia ŭ horadzie buduć dziejničać novyja rascenki na evakuacyju aŭto.
Jak i raniej, cana transpartavańnia evakuiravanaha aŭto na štrafstajanku budzie zaležać ad typu pahruzki:
- pry poŭnaj pahruzcy na evakuatar — 105 rubloŭ (raniej było 80 rubloŭ),
- pry častkovaj pahruzcy — 65 rubloŭ (hetaja suma zastałasia niaźmiennaj, stolki ž płacili i dahetul).
Źjaviŭsia i novy punkt — prymusovaje adbuksiravańnie (evakuacyja) biez dastaŭki transpartnaha srodku na achoŭvajemuju stajanku z poŭnaj pahruzkaj na evakuatar. Raniej takaja pasłuha evakuataraŭ u dakumiencie prapisanaja nie była. Ciapier za takuju manipulacyju daviadziecca zapłacić 75 rubloŭ.
Akramia taho, haradskija ŭłady źmianili pryncypy raźliku koštu zachoŭvańnia transpartnaha srodku na štrafstajancy. Kali raniej taryfy byli dyfierencyravanyja (najdaražejšymi byli pieršyja troje sutak — 8 rubloŭ u sutki, a dalej košt źnižaŭsia da 4,50 rubla (na 4—9-ja sutki) i 3,50 rubla za kožnyja nastupnyja sutki zvyš 10 sutak zachoŭvańnia), to ciapier u dakumiencie prapisany adzin (i daražejšy) taryf — 9 rubloŭ u sutki.
Evakuacyja aŭto ŭ Biełarusi prymianiajecca jak «miera apieratyŭnaha reahavańnia» na fakt parušeńnia Praviłaŭ darožnaha ruchu (PDR), a mienavita — na niapravilnuju parkoŭku. Akramia taho, što ŭładalniku niapravilna zaparkavanaha aŭto daviadziecca zapłacić za evakuacyju i zachoŭvańnie na štrafstajancy, nieabchodna budzie taksama apłacić štraf DAI.
Zhodna z artykułam 18.18 Kodeksa ab administracyjnych pravaparušeńniach za spynieńnie ŭ nienaležnym miescy abo parkoŭku z parušeńniem pravił biełarusam mohuć pahražać nastupnyja štrafy:
- za spynieńnie abo stajanku z parušeńniem PDR — štraf u pamiery 1 bazavaj vieličyni (42 rubli na siońnia),
- dla hruzavikoŭ, aŭtobusaŭ, traktaroŭ, samachodnych mašyn, pryčepaŭ štraf pavialičvajecca da 5 bazavych vieličyń (210 rubloŭ) (a za paŭtornaje parušeńnie na praciahu hoda — da 10 bazavych vieličyń (420 rubloŭ),
- za niepravamiernuju stajanku na miescach, vydzielenych dla invalidaŭ, — štraf u 2 bazavyja vieličyni (84 rubli).
Ciapier čytajuć
Na pieradśmiarotnym videa z kałonii nasamreč byŭ nie Vitold Ašurak. Źjavilisia novyja padrabiaznaści śmierci palitviaźnia13
Kamientary