U Azierbajdžanie vykładčyka asudzili na 15 hadoŭ za pierapisku z armianami
Bakinski sud pa ciažkich złačynstvach pryznaŭ daktaranta kafiedry palitałohii Karłava ŭniviersiteta (Praha) Bachruza Samiedava vinavatym u dziaržaŭnaj zdradzie i prysudziŭ jaho da 15 hadoŭ pazbaŭleńnia voli — faktyčna za pierapisku z žycharami Armienii i publičnuju antyvajennuju pazicyju, piša Bi-bi-si.
Pavodle viersii śledstva, małady navukoviec pisaŭ i pierakładaŭ artykuły z krytykaj azierbajdžanskich uładaŭ pa zakazie armianskich śpiecsłužbaŭ.
Adnak sam asudžany heta paśladoŭna i kateharyčna admaŭlaje — a jaho abarona nie stamlajecca nahadvać, što abvinavačańnie zasnavana vyklučna na kanfiskavanaj u Bachruza pierapiscy z tryma armianskimi žančynami.
«Ale ŭ hetaj pierapiscy niama ničoha, što ŭtvaraje skład złačynstva «dziaržaŭnaja zdrada», — zajaŭlała jahonaja advakat Zibiejda Sadyhava. — Tam niama ničoha takoha, kab Samiedavu dali zadańnie pa niejkim dziaržaŭna važnym pytańni, i kab Bachruz vykanaŭ heta daručeńnie».
Pry hetym, pa słovach abaroncaŭ asudžanaha palitołaha, na radzimie Samiedaŭ viadomy svajoj rezkaj krytykaj azierbajdžanskich uładaŭ, jakuju jon adkryta vykazvaŭ u zamiežnych vydańniach.
Vyśvietliłasia, što sprava suprać palitołaha zaviedzienaja Słužbaj dziaržaŭnaj biaśpieki Azierbajdžana (SDB) pa artykule 274 (zdrada radzimie) — za nibyta mieŭšaje miesca supracoŭnictva azierbajdžanskaha palitołaha z armianskimi śpiecsłužbami.
U krasaviku, užo bolš za paŭhoda znachodziačysia ŭ SIZA, Samiedaŭ źviarnuŭsia da premjer-ministra Armienii Nikoła Pašyniana z adkrytym listom, u jakim prasiŭ aficyjna paćvierdzić, što na samoj spravie nijakaha supracoŭnictva z armianskimi śpiecsłužbami nie było.
U Kryminalnym kodeksie Azierbajdžana za dziaržaŭnuju zdradu praduhledžana pakarańnie ŭ vyhladzie pazbaŭleńnia voli na termin ad 12 da 20 hadoŭ, a ŭ niekatorych vypadkach — i pažyćciovaje źniavoleńnie. SDB prasiła sudździa adpravić Samiedava za kraty na 16 hadoŭ.
Jak paviedamiła žurnalistam jahonaja babula Zibiejda Asmanava, 19 červienia, daviedaŭšysia pra toje, jakoha terminu patrabuje dla jaho prakuratura, Bachruz Samiedaŭ abviaściŭ u izalatary suchuju haładoŭku.
Kali nijakaj reakcyi na heta nie paśledavała, jašče praz dva dni, u minułuju subotu, Samiedaŭ ździejśniŭ u SIZA sprobu samahubstva.
Ciapier čytajuć
Na svoj dzień naradžeńnia Zialenski z Naŭrockim, Naŭsiedam i Cichanoŭskaj u Vilni ŭšanuje pamiać Kastusia Kalinoŭskaha3
Kamientary