На беларускай трасе М10, якая злучае мяжу з Расіяй, Гомель і Кобрын, ужо каля двух гадоў выпрабоўваюць новую сістэму абароны дарог ад дзікіх жывёл. Калі праект пакажа сваю эфектыўнасць, такое абсталяванне плануюць распаўсюдзіць па ўсёй Беларусі, піша БелТА.
Пілотны праект рэалізуецца сумесна з Нацыянальнай акадэміяй навук. На адным з участкаў трасы створаны наземны пераход для жывёл, але галоўная задача сістэмы — не дапусціць іх выхаду непасрэдна на праезную частку.
Для гэтага ў месцах разрыву агароджы паставілі датчыкі руху. Калі побач з дарогай праходзіць жывёліна, датчык фіксуе яе і перадае сігнал на дарожны знак са зменнай інфармацыяй. Знак пачынае свяціцца і папярэджвае кіроўцаў, што побач з дарогай знаходзіцца дзікая жывёліна. Пры гэтым жывёліна можа яшчэ не быць на самой праезнай частцы, але знаходзіцца непадалёк ад яе.
Падыходы да пераходу таксама абсталявалі адмысловымі шумавымі палосамі з буйнога жвіру. Такая паверхня стварае дыскамфорт для капытоў жывёл, таму яны менш ахвотна спрабуюць пераскочыць праз яе і выйсці на дарогу.
Яшчэ адзін элемент сістэмы — асвятленне. Яно не толькі дапамагае лепш бачыць участак дарогі, але і павінна адпужваць жывёл ад уваходу ў асветленую зону.
Канструкцыю пастаянна ўдасканальваюць з улікам вынікаў яе эксплуатацыі. Спецыялісты лічаць, што найбліжэйшым часам набыты на М10 досвед можна будзе выкарыстаць і на іншых беларускіх трасах.
Падобную сістэму цяпер ствараюць і на трасе М6 Мінск — Гродна ў Валожынскім раёне. Там плануюць выкарыстаць дадатковыя сродкі абароны, у тым ліку так званыя «тэхаскія вароты», або канадскія скотапрагоны. Яны выкарыстоўваюцца ў месцах, дзе звычайная сеткавая агароджа не можа цалкам перакрыць шлях жывёлам, напрыклад на перасячэннях і прымыканнях.
Асаблівая канструкцыя такіх варот стварае для жывёлы нязручнасць, таму яна не пераходзіць далей і вяртаецца назад. Акрамя таго, на канцах агароджы ўсталююць адмысловыя аднабаковыя клапаны. Яны будуць працаваць па прынцыпе выхаду толькі ў адзін бок: калі жывёліна ўжо апынулася каля канца агароджы, клапан дазволіць ёй пайсці ў лес, але не дасць іншым жывёлам выйсці з лесу на трасу.
У рэалізацыі праекта ўдзельнічаюць не толькі спецыялісты «БелдарНДІ». Датчыкамі займаецца таксама «Белдарсувязь», а ўладальнікі дарог адказваюць за ўстаноўку адпаведных канструкцый.
Уладальнік аршанскай кавярні трапіў у страшную аварыю з ласём — тыдзень ляжаў у рэанімацыі і нічога не памятаў пра тое
На трасе пад Смалявічамі быў заўважаны вельмі выхаваны лось ВІДЭА
Міліцыя папярэдзіла пра дзікіх жывёл, што выходзяць на трасы
У Дзяржынскім раёне ў аварыі пацярпелі тры чалавекі. Кіроўца аб'язджаў дзікую жывёліну
Цяпер чытаюць
Пра што маўчыць Аляксей Францкевіч, якому Польшча закрыла ўезд на 10 гадоў10
Каментары
Няўжо так складана проста насыпаць над дарогай насып, як гэта робяць у Польшчы? Зверху жывёлы, а у створаным тунэлі машыны.