Расійскі пранкер кінуў грошы ў ваду і здымаў на ВІДЭА, хто палезе іх даставаць
Але жорстка пралічыўся з месцам для жарту. У выніку яму пагражае да 5 гадоў калоніі.
У Расіі затрымалі байца поп-ММА Святаслава Каваленку і ягонага сябра пасля скандальнага відэа, на якім яны прапаноўвалі людзям ныраць у ваду за купюрай у 5 тысяч расійскіх рублёў (каля 59 даляраў) каля Мамаева кургана ў Валгаградзе.
Паводле звестак расійскіх СМІ, 24 ліпеня 36‑гадовы блогер разам з сябрам кінуў грошы каля манумента «Стаяць насмерць» і заклікаў людзей дастаць іх з вады. Усё гэта ён зняў на відэа і пасля апублікаваў у сацыяльных сетках. Ягоны 31‑гадовы знаёмы Андрэй Ярашэнка пры гэтым сыграў ролю мінака, які нібыта скочыў у ваду за грашыма.
Пасля скандалу, які ўзнік пасля гэтага выпадку, Каваленка і Ярашэнка з'ехалі з Валгаградскай вобласці.
Пасля мужчын затрымалі ў розных рэгіёнах Расіі. Іх абвінавачваюць у апаганенні вайсковых пахаванняў і мемарыяльнага збудавання. За такое злачынства ім можа пагражаць да пяці гадоў пазбаўлення волі і штраф да 5 мільёнаў расійскіх рублёў.
Пазней суд арыштаваў Каваленку і Ярашэнку да 5 кастрычніка. Баец сваю віну прызнаў, а яго сябар — не.
Каментары