«Я вам скажу — зусім не тое!» На 80‑годдзі ва Уроцлаве Някляеў параўнаў пацалункі Брэжнева і Ціханоўскай
Уладзімір Пракопавіч быў у гуморы, шмат жартаваў і раздаваў кампліменты гасцям.
11 ліпеня ў дворыку Нацыянальнага інстытута імя Асалінскіх (Ossolineum) ва Уроцлаве адбылася літаратурная вечарына з нагоды 80‑годдзя Уладзіміра Някляева. Павіншаваць сапраўды народнага паэта і пісьменніка Беларусі прыйшлі сябры, калегі, чытачы, а таксама Аб’яднаны пераходны кабінет Беларусі на чале са Святланай Ціханоўскай, піша Reform.news.
Уладзімір Пракопавіч быў у гуморы, шмат жартаваў і раздаваў кампліменты гасцям.
Ужо зараз па інтэрнэце разляцеўся досціп ад паэта пасля віншавальнага пацалунку Святланы Ціханоўскай.
«Я ўспомніў, што некалі з Брэжневым цалаваўся. Ну, я вам скажу — зусім не тое! — прамовіў творца і дадаў. — Давайце жанчын выбіраць — і будзе каго цалаваць!».
Аўтар раманаў «Аўтамат з газіроўкай з сіропам і без», «Гэй Бэн Гіном» падзякаваў польскаму боку за гасціннасць і прытулак у выгнанні.
Ад імя гаспадароў пляцоўкі з цёплымі словамі і віншаваннямі да паэта звярнуліся прадстаўнікі найвышэйшага кіраўніцтва Асалінэума — намеснік дырэктара інстытута Гжэгаж Макух і намесніца дырэктара па Музеі князёў Любамірскіх Іаанна Блох, якія асабіста прывіталі беларускага творцу і гасцей вечарыны.
У сваю чаргу вядомая польская даследчыца цэнтральнаеўрапейскай літаратуры, доктар гуманітарных навук і кіраўніца аддзела камунікацый Асалінэума Катажына Учкевіч падкрэсліла, што творчасць Уладзіміра Някляева асаблівым чынам блізкая польскай культуры і зразумелая мясцоваму чытачу, але разам з тым паэт застаецца неверагодна самабытным творцам, які адкрывае свету ўнікальны і непаўторны голас Беларусі.
Павіншаваць намінанта на Нобелеўскую прэмію прыехалі і з Беластока. Так, кіраўнік Цэнтра беларускай культуры ў Беластоку Анатоль Вап разам са сваім вядомым цёзкам — галоўным рэдактарам тыднёвіка «Ніва» і дырэктарам «Радыё Рацыя» Яўгенам Вапам — падарылі юбіляру карціну з выявай зубра.
Менавіта Беластоцкі цэнтр супольна з фондам Kamunikat.org выдаў да юбілею новую кнігу апавяданняў Някляева «Святая крыніца». Набыць імпрэзавае выданне і атрымаць аўтограф паэта можна было адразу на месцы падчас сустрэчы.
Сярод гасцей урачыстасці былі і іншыя знакавыя постаці сучаснай культуры — паэты Андрэй Хадановіч і Наста Кудасава, іншыя творцы.
Кульмінацыяй імпрэзы стала аўтарскае дэкламаванне. Уладзімір Някляеў у каторы раз давёў, што яго слова здольнае трымаць і натхняць любую аўдыторыю — паэт быў «ва ўдары» і скарыў публіку фрагментамі з паэм «Паланез» і «Ягайла».
Завяршыўся літаратурны вечар музычнай часткай і святочным тортам. Пасля імпрэзы да юбіляра яшчэ вельмі доўга стаяла шчыльная чарга ахвотных атрымаць запаветны аўтограф і асабіста пажадаць паэту доўгіх гадоў жыцця.
Цяпер чытаюць
У Слуцку жанчыну аштрафавалі за пакінутыя каля сметніцы добрае адзенне і лінолеум. Людзі не вытрымалі, даведаўшыся пра гэта11
У Слуцку жанчыну аштрафавалі за пакінутыя каля сметніцы добрае адзенне і лінолеум. Людзі не вытрымалі, даведаўшыся пра гэта
У Чэхіі палякі збілі паляка, прыняўшы яго за ўкраінца з-за шапкі ў колерах Верхняй Сілезіі. Хлопец ехаў у велапрабег дзеля хворай на рак цяжарнай партнёркі2323
У Чэхіі палякі збілі паляка, прыняўшы яго за ўкраінца з-за шапкі ў колерах Верхняй Сілезіі. Хлопец ехаў у велапрабег дзеля хворай на рак цяжарнай партнёркі23
«Час, які патрабуе надзвычайнай асцярожнасці». Польскі вундэркінд, які стаў галоўным навукоўцам OpenAI, патлумачыў, чаму менавіта зараз ШІ можа вырвацца з-пад кантролю88
Каментары