У Расіі пасудамыйшчыцу, якая працавала ў кадэцкім корпусе СК, прыгаварылі да 19 гадоў калоніі за вярбоўку вучня
Жанчыну абвінавацілі ў вярбоўцы кадэта ў легіён «Свабода Расіі».
Вайсковы суд у Маскве вынес прысуд 53‑гадовай Аляксандры Жыценка — былой настаўніцы англійскай мовы, якая працавала пасудамыйшчыцай у Кадэцкім корпусе Следчага камітэта. Жанчыну прызналі вінаватай у вярбоўцы падлетка ў легіён «Свабода Расіі» і тэрарызме, прысудзіўшы яе да 19 гадоў калоніі і вялікага штрафу.
Сама Жыценка настойвае, што ўся яе дзейнасць была толькі складанай імітацыяй і «педагагічным прыёмам», накіраваным на тое, каб уберагчы кадэта ад рэальных кантактаў з экстрэмістамі.
Гісторыя пачалася з таго, што Жыценка, маючы вышэйшую адукацыю і ведаючы некалькі моў, уладкавалася на кухню кадэцкага корпуса. Яе паводзіны былі незвычайнымі. Напрыклад, яна арганізавала для выхаванцаў своеасаблівую гульню: плаціла ім грошы за якаснае дзяжурства ў сталовай, рашэнне тэстаў ЕГЭ і выкананне творчых заданняў. Каб выплачваць гэтыя «прэміі», жанчына ўлезла ў велізарныя даўгі перад блізкімі і банкамі, расказвае «Медыязона».
Сярод кадэтаў жанчына вылучыла падлетка Аляксея, з якім у Жыценка завязаліся даверлівыя адносіны. Паводле версіі следства, яна рыхтавала яго да шпіянажу ў вайсковых часцях і спрабавала ўцягнуць у тэрарыстычную арганізацыю.
Аднак сама падсудная апісвала зусім іншую карціну. Яна сцвярджала, што заўважыла небяспечную цікавасць хлопца да забароненага легіёна і вырашыла ўзначаліць гэты працэс, каб кантраляваць яго.
ФСБ больш за год сачыла за жанчынай, перад затрыманнем у ліпені 2024 года. Галоўным доказам у справе стаў зроблены спецслужбай запіс размоў паміж Жыценка і кадэтам.
Суд палічыў довады жанчыны аб педагагічным эксперыменце непераканаўчымі, нягледзячы на відавочную абсурднасць некаторых эпізодаў справы.
Прысуд у 19 гадоў стаў адным з самых суровых па падобных справах.
Цяпер чытаюць
«Ліпа ва ўсіх сэнсах». Вось як будуць выглядаць дрэвы ў вазонах на галоўным мінскім праспекце. Блогеры атрымалі заданне імі захапляцца10
Каментары