Беларусбанк часова абмежаваў валютна-абменныя аперацыі па банкаўскіх картках. Пра гэта паведамляецца на афіцыйным сайце ўстановы.
Абмежаванні набылі моц 29 ліпеня 2026 года і тычацца пераводаў з карткі на картку па рахунках у замежнай валюце — далярах ЗША, еўра, расійскіх рублях і кітайскіх юанях. Яны распаўсюджваюцца на выпадкі, калі валюта пераводу не супадае з валютай рахунку адпраўніка і (або) атрымальніка. Выключэнне зроблена толькі для аперацый з выкарыстаннем беларускіх рублёў.
У сувязі з увядзеннем абмежаванняў часова недаступнымі сталі адпраўка і залічэнне такіх пераводаў у валюце, адрознай ад валюты рахунку, праз інфакіёскі і банкаматы Беларусбанка, сістэму інтэрнэт-банкінгу, афіцыйны сайт банка, сэрвіс «М-Банкінг», анлайн-банк Belarusbank, а таксама праз сэрвісы дыстанцыйнага абслугоўвання іншых банкаў.
У банку адзначылі, што гаворка ідзе менавіта пра часовае абмежаванне. Прычыны яго ўвядзення і магчымыя тэрміны аднаўлення поўнага функцыяналу пакуль не паведамляюцца.
Беларусбанк — найбуйнейшы банк Беларусі. Ён быў створаны ў 1991 годзе, а ў 1995‑м рэарганізаваны пасля зліцця з Ашчадбанкам Беларусі. Дзяржаве належыць 99,95 працэнта статутнага фонду банка. Яго сетка ўключае шэсць абласных упраўленняў, 118 цэнтраў банкаўскіх паслуг і каля 1,2 тысячы пунктаў продажу банкаўскіх прадуктаў.
Дом, з якога расійскія гастралёры спрабавалі скрасці мільёны даляраў, належыць былому выканаўчаму дырэктару Беларусбанка
Беларусбанк пашырыў сетку аддзяленняў з тэхналогіяй асабістай біяметрыі
У новым анлайн-банкінгу Беларусбанка з'явілася беларуская мова
Беларусбанк уводзіць камісію за прыём наяўных у расійскіх рублях
Каментары