Кватэры ў Мінску на другасным рынку падаражэлі на 27% з пачатку года
На сталічным рынку кватэр за першае паўгоддзе было зарэгістравана 6244 здзелкі, што на 17% менш у параўнанні з такім жа перыядам мінулага года. Пры гэтым сярэдні кошт квадратнага метра на другасным рынку вырас на 27%, піша Office Life.
Цэны на кватэры працягваюць расці на фоне абмежаванай прапановы. Цяпер на рынку назіраецца дысбаланс паміж колькасцю прапанаваных кватэр і тым, што пакупнікі гатовыя набываць.
Сярэдні кошт квадратнага метра на «другасным рынку» павялічыўся за першае паўгоддзе на 420—470 даляраў у залежнасці ад колькасці пакояў. Як адзначаюць эксперты, на рост цэн уплываюць некалькі фактараў: павелічэнне даходаў насельніцтва на 7,9%, даступныя крэдыты пасля зніжэння стаўкі рэфінансавання, а таксама стабільны курс беларускага рубля.
На рост коштаў паўплывала і скарачэнне прапановы. За год колькасць кватэр на другасным рынку зменшылася з 6,8 тыс. да 4,5 тыс.
У цэлым у студзені — чэрвені гэтага года пакупнікі заплацілі за кватэры 689,8 млн даляраў. Гэта на 5% больш, чым годам раней. Пры гэтым агульная плошча набытага жылля зменшылася на 17% і склала 325,6 тыс. кв. м.
Як адзначылі ў Нацыянальным кадастравым агенцтве, у першым паўгоддзі прыкметна знізіўся попыт на жыллё ў сучасных дамах, пабудаваных пасля 2020 года. Іх доля ў здзелках зменшылася з 30% да 25%. На першасным рынку вярнуўся звычайны ўзровень — 9—12% ад агульнай колькасці аперацый куплі-продажу.
Што датычыцца структуры сталічнага рынку жылля, то ў другім квартале на «другасным рынку» 44% здзелак прыйшлося на аднапакаёвыя кватэры, 35% аперацый былі зарэгістраваныя з «двушкамі», 18% — з трохпакаёвымі кватэрамі. Падобная сітуацыя была і ў студзені — сакавіку.
А вось на першасным рынку 77% здзелак у красавіку — чэрвені заключылі на аднапакаёвыя кватэры. Праўда, у параўнанні з першым кварталам іх колькасць знізілася на 10%.
За другі квартал гэтага года ў Мінску прадалі 13 кватэр даражэй за 1 млн рублёў. Самыя дарагія кватэры сталіцы знаходзіліся на вуліцах Віталя Цвіркі, Грыбаедава, Кірава, Кісялёва, Новавіленскай, Ратамскай, Смалячкова і Старажоўскай.
Цяпер чытаюць
Стала вядомая асоба рабочага «Беларуськалія», які загінуў пры абрушэнні горнай пароды1
Каментары
[Зрэдагавана]