Праз канфлікт з Папам Трамп пачаў страчваць падтрымку выбаршчыкаў. У Вашынгтоне загаварылі пра прымірэнне
Публічны канфлікт паміж прэзідэнтам ЗША Дональдам Трампам і Папам Рымскім Львом XIV пачаў адбівацца на электаральных пазіцыях амерыканскага лідара. Пасля ўзаемнай крытыкі, абвінавачванняў і адмены візіту пантыфіка ў ЗША, рэйтынгі Трампа сярод хрысціянскіх выбаршчыкаў папаўзлі ўніз. На гэтым фоне адміністрацыя Белага дома робіць спробы згладзіць сітуацыю.
Як паведамляе выданне Bild, сутычка пачалася з крытыкі з боку Папы сучаснай міжнароднай палітыкі.
Падчас свайго нядаўняга візіту ў Камерун пантыфік заявіў, што свет «разбураецца жменькай тыранаў», і асудзіў тых, хто скажае рэлігію для ваенных і эканамічных мэт. Гэта было ўспрынята як прамая крытыка дзеянняў ЗША на Блізкім Усходзе. Яшчэ раней Пентагон выклікаў папскага нунцыя, каб выказаць незадаволенасць міратворчымі заклікамі Ватыкана.
У адказ Трамп абрынуўся на пантыфіка з крытыкай, назваўшы яго «жахлівым» у пытаннях знешняй палітыкі. Сітуацыя яшчэ больш абвастрылася, калі прэзідэнт ЗША апублікаваў у сацыяльных сетках згенераваныя штучным інтэлектам малюнкі, дзе ён стаіць побач з Ісусам або проста паўстае ў яго вобразе. Пасля хвалі абвінавачванняў у богазневажанні Трамп выдаліў адзін з допісаў, патлумачыўшы, што «думаў, што паказаны ў ролі доктара».
У выніку скандалу і беспрэцэдэнтных намёкаў з боку Пентагона пра магчымае «выкраданне», Ватыкан адмяніў запланаваную на гэты год паездку Папы Льва XIV у ЗША.
Сам Папа пазней патлумачыў журналістам, што ягоная прамова ў Камеруне была напісаная за два тыдні да крытыкі з боку Трампа і не была адрасаваная непасрэдна яму.
«Але яе ўспрынялі так, быццам я спрабую пачаць новую дыскусію з прэзідэнтам, да чаго ў мяне няма ніякай цікавасці», — адзначыў ён. Разам з тым пантыфік дадаў, што не баіцца адміністрацыі ЗША і будзе далей выступаць супраць войнаў.
Гэты палітычны клінч пачаў каштаваць Трампу галасоў. Паводле даных Pew Research Center, падтрымка прэзідэнта сярод каталіцкіх выбаршчыкаў знізілася з 55% да 46%. Незадаволенасць расце і сярод пратэстантаў, якія доўгі час былі ягонай самай устойлівай базай.
«Паводзіны Трампа ставяць людзей, якія гадамі яго падтрымлівалі, у няёмкае становішча», — заявіў уплывовы евангельскі пастар Эрык Эрыксан.
Як адзначаюць эксперты, гэтая тэндэнцыя азначае, што значная частка правых выбаршчыкаў можа апынуцца ў апазіцыі да Трампа на лістападаўскіх прамежкавых выбарах у Кангрэс. Страта рэспубліканцамі большасці можа істотна абмежаваць уплыў прэзідэнта.
Усведамляючы гэтыя рызыкі, адміністрацыя ЗША пачала рабіць крокі да прымірэння. Віцэ-прэзідэнт Джэй Дзі Вэнс нядаўна апублікаваў прымірэнчы допіс:
«Папа Леў прапаведуе Евангелле, як яму і належыць, і гэта непазбежна азначае, што ён выказвае сваё меркаванне па актуальных маральных пытаннях. Прэзідэнт і ўся адміністрацыя працуюць над тым, каб прымяняць гэтыя маральныя прынцыпы ў нашым бязладным свеце».
Ватыкан пакуль ніяк не пракаментаваў гэтую заяву.
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары
Хто наступны на чарзе - ведае адзін Трамп, бо заўсёды хавае свае спецаперацыі ў сакрэце.