Дарадца Наўседы абвергнуў інфармацыю пра стварэнне «буфернай зоны» ў краінах Балтыі
Пасля з’яўлення інфармацыі пра тое, што былы генеральны сакратар НАТА Енс Столтэнберг у 2021 годзе нібыта быў гатовы абмеркаваць з Расіяй вывад сіл Альянсу з Усходняй Еўропы і стварэнне «буфернай зоны», якая ахоплівала б краіны Балтыі, галоўны дарадца прэзідэнта Літвы Дэйвідас Матулёніс назваў гэта дэзынфармацыяй, піша Delfi.lt.
«Магу адразу сказаць, што гэта чарговая дэзынфармацыя (…) Напрыканцы 2021 года расіяне сапраўды прадставілі гэтыя так званыя ўльтыматумы як НАТА, так і Злучаным Штатам, дзе яны вельмі дакладна выклалі ўсе патрабаванні. Гэтыя ўльтыматумы былі сапраўды грубымі. Адным з іх аспектаў быў менавіта вывад усіх саюзных сіл з новых членаў НАТА, якія далучыліся пасля 1997 года. Гэта азначала б, што гэта закранула б 12 дзяржаў», — сказаў Матулёніс радыёстанцыі LRT у пятніцу.
«Гэта быў ультыматум Расіі. Нам яго прадставілі, мы яго бачылі. Абмеркаванняў з гэтай нагоды не было (…). Ён быў катэгарычна адхілены», — падкрэсліў ён.
Як паведамляецца, латвійскае выданне Baltic Sentinel піша, што ў 2021 годзе былы генеральны сакратар НАТА Енс Столтэнберг быў гатовы абмеркаваць з Расіяй вывад сіл НАТА з Усходняй Еўропы і стварэнне «буфернай зоны», якая ахоплівала б краіны Балтыі.
У аглядзе мемуараў Столтэнберга, апублікаваным у выданні, гаворыцца, што восенню 2021 года тагачасны кіраўнік НАТА сустракаўся з міністрам замежных спраў Расіі Сяргеем Лаўровым, каб абмеркаваць ідэю такой буфернай зоны, не паведаміўшы пра гэта найбольш уразлівых саюзнікаў. Хоць Польшча і краіны Балтыі катэгарычна выступалі супраць любых саступак Расіі, паводле Baltic Sentinel, тагачасны генеральны сакратар НАТА прызнаў, што ігнараваў іх занепакоенасць і быў гатовы вярнуць размяшчэнне сіл НАТА да пазіцый 1997 года.
У публікацыі прыводзяцца кароткія размовы з неназванымі эстонскімі дыпламатамі, якія нібыта пацвярджаюць, што Столтэнберг спрабаваў узняць гэтую ідэю за спінамі саюзнікаў па НАТА ў рэгіёне Балтыйскага мора.
Baltic Sentinel сцвярджае, што Крэмль, які імкнуўся да поўнага кантролю над рэгіёнам, у выніку адхіліў такі план. У сваіх мемуарах Столтэнберг піша, што яго погляды на адносіны з Расіяй сфармаваліся пад уплывам яго бацькі, Торвальда, былога міністра замежных спраў Нарвегіі, які нават падчас Халоднай вайны прасоўваў дыялог з Масквой.
Каментары