Віцэ-міністр замежных справаў Польшчы: Мы ніколі не пагодзімся на Беларусь як частку рускага свету
У межах святкавання беларускага Дня Волі, якое традыцыйна ладзіць МЗС Польшчы, віцэ-міністр замежных справаў Польшчы Уладзіслаў Тэафіл Барташэўскі акцэнтаваў сваю ўвагу на тым, што Польшча зробіць усё магчымае, каб супраціўляцца сітуацыі, у якой заахвочваюцца неаімперскія і неакаланіяльныя амбіцыі Расіі, што разглядае Беларусь як частку рускага свету. «Мы ніколі на гэта не пагодзімся», — падкрэсліў ён.
«Дэмакратычнае развіццё Беларусі мае прынцыповае значэнне для Польшчы, нашага рэгіёна і Еўропы і з'яўляецца перадумовай для бяспекі і развіцця. Мы не хочам, каб Лукашэнка кіраваў Беларуссю, мы не хочам, каб расіяне кіравалі Беларуссю. Мы хочам вольных беларусаў, якія далучацца да Еўрасаюза і з якімі ў нас будуць нармальныя дзяржаўныя адносіны», — заявіў віцэ-міністр.
Ён таксама распавёў, што паспеў пагутарыць з нацыянальнай лідаркай Беларусі Святланай Ціханоўскай на тэму таго, як працягваць верыць у незалежнасць, калі вакол такія крывавыя дыктатары, якія прыгнятаюць народ.
«Я лічу, што іншага варыянта [як працягваць верыць] няма, — адзначыў Уладзіслаў Тэафіл Барташэўскі. «Мы прайшлі той жа шлях. Вядома, Польшчы было лягчэй, таму што мы не былі часткай Савецкага Саюза. І мы гэта разумеем і шануем. Але на працягу дзесяцігоддзяў мы мелі незалежны ўрад у выгнанні і заўсёды верылі, што гэта сапраўдны ўрад нашай краіны. І мы заўсёды верылі, што аднойчы мы будзем вольныя. На гэта сышоў час — з 1945 па 1990 год. Але ўрэшце мы гэтага дамагліся. Не ўсе пакаленні палякаў верылі, што будуць вольнымі пры іх жыцці, але не сумняваліся, што ўрэшце свабода будзе».
«З 2020 года прайшло амаль шэсць гадоў. Але ёсць святло. У вас ёсць прадстаўнікі, якія працуюць вельмі эфектыўна і імкнуцца рабіць самае важнае — яднаць розныя групы беларускіх эмігрантаў, таму што тут яны могуць працаваць як вольныя людзі. Я хачу, каб вы ўсе зразумелі, што фундаментальная мэта кожнага беларуса — стварэнне суверэннай, незалежнай, дэмакратычнай Беларусі як часткі Еўропы. Таму што не можа быць вольнай Еўропы без вольнай Беларусі. Мы ж у сваю чаргу заўсёды верылі, што няма свабоды без салідарнасці. Мы салідарныя з Беларуссю», — падкрэсліў польскі віцэ-прэм’ер.
Каментары
Вось на гэта мусяць зьвярнуць увагу рэдактары і аўтары артыкулаў Нашай Нівы! І болей ніколі не называць Лукашэнку "беларускім лідарам", а яго паслугачоў "беларускімі ўладамі". Бярыце прыклад з палякаў.