«На Каменнай Горцы жыву. Спала выдатна». Пад ролікі пра дрон нагналі тых самых ботаў
Ролік у тыктоку пра гук дрона, які ноччу чулі жыхары як розных раёнаў сталіцы, так і іншых населеных пунктаў краіны, стаў аб'ектам інтэрвенцыі ботаў.
У каментарах пад ролікам карыстальнікі масава пацвярджаюць: дрон ці дроны ўначы на 23 сакавіка над Беларуссю сапраўды лёталі. Людзі з розных пунктаў Беларусі апісваюць незвычайныя гукі, якія многіх прымусілі прачнуцца:
«У нас у Гродне выразна было чуваць».
«У Гродне каля трэцяй гадзіны ночы, усе прачыналіся ад незвычайнага гуку».
«У Гродзенскім раёне каля трох ночы».
«У Гродне а 3:29».
«У Бараўлянах быў чуваць ноччу недзе +— 3, 4 гадзіны раніцы, гул, але гэта не верталёт. Самалёт можа быць, шчыра, гул як у ракеты»
«Праўда, гук быў моцны. Мінск»
«У Віцебскім раёне тое самае было!»
«Быў гук у раёне Заслаўя, а 3:30 ночы прыкладна, вось ён якраз-такі і разбудзіў»
«У Маладзечне таксама каля трох ночы я чула. Гук быў вельмі моцны»
«Жыву ў Мінску! Чула. У раёне плошчы Ванеева! Ніякіх глюкаў!»
Адначасова з хваляй сведчанняў у каментары «нагнала» групу акаўнтаў, задача якіх — максімальна знізіць градус напружанасці і абвергнуць любыя факты. Іх допісы напісаныя як пад капірку:
«Я на Каменнай Горцы жыву. спала выдатна, ніякага шуму, не разводзьце брахні».
«Я на Каменнай Горцы жыву. Спаў выдатна».
«Жыву на Камароўцы! Першы раз гэта чую! Брахня!»
«Брахня, жыву ў Мінску, нічога не было!!!»
«Брахня».
Частка «адвакатаў цішыні» дзейнічае больш вытанчана, называючы канкрэтныя мікрараёны, каб стварыць ілюзію спакою на месцах:
«Жыву ў раёне Кунцаўшчына, нічога падобнага не было, усё спакойна»
«Жыву ў Мінску, нічога не чула».
«Зялёны Луг. Так дрэнна ноччу сёння спала, амаль не спала, але наогул нічога не чула падобнага»
«Жыву ў Мінску каля Каменнай Горкі. Нічога не было, ніякіх гукаў».
«Жыву каля Каменнай Горкі, нічога не чула (акно было адчыненае) акрамя тралейбуса, які праходзіў раніцай»
«Сухарава, нічога не чула, хоць вельмі чуйна сплю».
«Жыву на Уруччы, ноччу была цішыня».
Яшчэ адна група каментатараў працуе па спрошчанай схеме — проста адмаўляюць відавочнае, не ўдаючыся ў падрабязнасці:
«Нічога не чула, вокны закрытыя, што там можна пачуць. Уставала а палове на чацвёртую, і нічога такога не заўважыла», «Я нічога не чула. Хопіць абы-што казаць», «Ніякія староннія шумы акрамя будзільніка на працу не былі чуваць».
Ёсць і тыя, хто паспрабаваў пакпіць, спрабуючы выставіць сведак «вар’ятамі»:
«Ноччу трэба спаць, а не сядзець у інтэрнэце, і глюкаў не будзе».
«НЛА блін, спаць ноччу трэба».
Такая сінхранізаваная «кантратака» ботаферы выглядае як адпрацаваны алгарытм. Падобную актыўнасць назіралі і раней, напрыклад, падчас абмеркаванняў экалагічнага стану паветра ў Мінску — тады арганізаваныя «каментатары» гэтак жа заўзята даказвалі, што ніякага смогу ў горадзе няма.
Каментары