Чаму Украіна ідзе на абвастрэнне адносін з Лукашэнкам? Запыталі ў Ігара Кізіма
Прэзідэнт Украіны Уладзімір Зяленскі ўвёў персанальныя санкцыі супраць Лукашэнкі. Нядаўна ён таксама сустрэўся са Святланай Ціханоўскай і запрасіў яе ў Кіеў.
Чаму Украіна пайшла на абвастрэнне адносін з беларускім рэжымам, чаго раней старанна пазбягала? На які вынік тут спадзяецца ўкраінскі бок? Запыталі ў былога спецпрадстаўніка Украіны ў пытаннях Беларусі Ігара Кізіма.
Суразмоўца адзначае, што тое, што мы назіраем — адэкватная рэакцыя на варожыя дзеянні Лукашэнкі ў адносінах да Украіны, хоць і запозненая.
«Са зменамі ў Офісе прэзідэнта Зяленскага адбыліся і змены ў палітыцы Украіны ў дачыненні да часткі цяперашняга рэжыму ў Беларусі, а таксама да беларускага кейса агулам, тых жа дэмакратычных сіл. Акрамя прапагандысцкіх і палітычных правакацый (напрыклад, сустрэча Лукашэнкі з так званым губeрнатарам часова акупаванай часткі Херсонскай вобласці), прымалася да ўвагі і ўзмацненне супрацы з РФ, размяшчэнне «Арэшніку», дазвол расійскім аператарам дронаў выкарыстоўваць тэрыторыю Беларусі для атак на ўкраінскія аб'екты».
Кізім называе дзеянні Украіны кансалідацыяй з санкцыйнай палітыкай ЕС, які ўжо даўно ўвёў персанальныя санкцыі супраць Лукашэнкі.
«Асабліва гэта актуальна цяпер, калі Еўропа ўзмацняе сваю адказнасць за еўрапейскія справы на фоне палітыкі прэзідэнта Трампа. Мы ж [украінцы] хочам быць з Еўропай», — каментуе Ігар Кізім.
Экс-пасол лічыць, што Украіна павінна граць самую актыўную, а, магчыма, і асноўную ролю ў беларускім пытанні, бо пацярпела ад суўдзелу рэжыму Лукашэнкі ў расійскай агрэсіі.
«А каб такую ролю граць, трэба расставіць усе кропкі над «i». Інакш украінскія ўлады ніхто не будзе ўспрымаць як сур'ёзнага гульца на рэгіянальным і еўрапейскім узроўні, у тым ліку і ў рамках мірнага працэсу і паcляваеннага ўрэгулявання».
Палітыка «не злаваць дзеда», на думку Ігара Кізіма, згубіла актуальнасць як мінімум год таму.
«Згадайце навагодні зварот Зяленскага і яго «Жыве Беларусь!» ці афіцыйнае паведамленне пра непрызнанне так званых выбараў Лукашэнкі ў 2025 годзе і гэтак далей. То бок, рыхтавалася падаплёка. А цяпер усё сышлося ў адным месцы і ў адзін час — і змены ў Офісе, і палітыка Трампа, і расійскія дроны. Але тут мае быць і сігнал для Лукашэнкі: ва Украіне ёсць яшчэ спосабы рэагаваць на яго «дурасці» і неадэкватныя паводзіны».
Цяпер чытаюць
Сталі вядомыя жахлівыя абставіны смерці былога вучонага сакратара Інстытута гісторыі. Яму было 45 гадоў11
Сталі вядомыя жахлівыя абставіны смерці былога вучонага сакратара Інстытута гісторыі. Яму было 45 гадоў
Яе не хацелі браць у музычную школу, а ў 14 яна сыграла ў Карнегі-холе ў Нью-Ёрку. Беларуская скрыпачка — пра жыццё ў Лондоне, заробкі і чым скрыпка Страдывары за 14 мільёнаў еўра адрозніваецца ад звычайнай1313
Каментары