Церцель: Паміж Беларуссю і Польшчай ідзе дыялог, мы дасягнём выніку
«Гэта цяжкая і сур'ёзная праца, але вынік будзе дасягнуты», заявіў старшыня КДБ Беларусі Іван Церцель. Ён намякае, што ад Польшчы патрабуюць адмовы ад падтрымкі антылукашэнкаўскіх сіл.
«З Польшчай у нас ідзе дыялог. Я б сказаў, што мы дасягнем выніку. Трэба, каб польскі бок, скажам так, стымуляваў некаторых сваіх саюзнікаў выканаць свае саюзніцкія абавязацельствы. У нас такое разуменне ёсць, у іх таксама разуменне ёсць. Праца цяжкая, сур'ёзная праца», — сказаў Іван Церцель.
Паводле яго слоў, дыялог з польскім бокам не спыняўся ніколі, існавалі кантакты паміж дыпламатычнымі ведамствамі на розным узроўні.
«Цяпер яны перайшлі ў больш актыўную фазу. Канешне, ёсць кантакты паміж спецслужбамі», — сказаў Церцель.
«Мы пэўны водгук знаходзілі, але не заўсёды знаходзілі рашэнне тых ці іншых вострых праблем. Цяпер такіх вострых праблем фактычна тры-чатыры ёсць. Яны звязаныя з неабходнасцю рабіць сустрэчныя крокі, разумеючы нашу зацікаўленасць у эканамічным развіцці, развіцці сувязей паміж людзьмі. І іншыя пытанні, якія патрабуюць рашэння КДБ», — дадаў кіраўнік ведамства.
Ён адзначыў, што абмяркоўваюцца і пытанні, звязаныя з тым, што лукашысты называюць «падрыўнымі цэнтрамі», якія існуюць на тэрыторыі суседніх дзяржаў — у краінах Балтыі, Польшчы і Украіне. Гаворка ідзе пра апазіцыйныя структуры за мяжой і беларускіх добраахвотнікаў.
«Мы абмяркоўваем з нашымі калегамі досыць адкрыта ў ходзе гэтых кантактаў. Яны разумеюць, што тыя праекты, якія намячаліся і пачалі рэалізоўвацца ў 2020 годзе, ужо немагчыма рэалізаваць. Таму для іх гэта пэўны груз, які яны хацелі б з сябе скінуць і не мець гэтага раздражняльніка ў адносінах», — сцвярджае Церцель.
У Польшчы Івана (у дзяцінстве — Яна) Церцеля лічаць адным з архітэктараў таталітарнага рэжыму ў Беларусі. Яго звязваюць таксама з арганізацыяй нелегальнай міграцыі, якая вымусіла Польшчу пабудаваць на мяжы сістэму загарод.
Цяпер чытаюць
Соф'я Сапега: Пратасевіч нагаварыў на мяне цэлы том крымінальнай справы33
Соф'я Сапега: Пратасевіч нагаварыў на мяне цэлы том крымінальнай справы
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары