Польшча абвясціла пра запуск найбуйнейшай у сваёй гісторыі праграмы вайсковай падрыхтоўкі пад назвай wGotowości («у Гатоўнасці»). Да 2027 года па ёй плануюць навучыць каля 400 тысяч добраахвотнікаў. Пра гэта паведаміў міністр абароны Польшчы Уладзіслаў Касіняк-Камыш.
У праграме змогуць удзельнічаць усе ахвотныя — ад студэнтаў да пенсіянераў. Пілотны этап пачнецца ўжо ў лістападзе.
Трэніроўкі будуць праводзіцца ў падраздзяленнях Узброеных сіл і войскаў тэрытарыяльнай абароны. Жыхары змогуць выбраць курс на свой густ: базавую вайсковую падрыхтоўку, першую дапамогу, асновы выжывання або кіберабарону. Да канца 2025 года навучанне павінны прайсці каля 20 тысяч чалавек.
Студэнтам цывільных ВНУ, якія вырашаць уступіць у рэзерв, будуць выплачваць стыпендыю ў 1000 злотых (каля 250 даляраў) у месяц.
Уладзіслаў Касіняк-Камыш адзначыў, што свет цяпер перажывае «найбольш небяспечны час з канца Другой сусветнай вайны»: ідзе вайна ва Украіне, адбываюцца дыверсіі ў Балтыйскім моры, а таксама актыўна вядзецца барацьба ў кіберпрасторы. Таму ўрад апошнія паўгода працаваў над праектам усеагульнай вайсковай падрыхтоўкі, каб умацаваць устойлівасць грамадства і падрыхтаваць людзей да магчымых пагроз.
Польшча цяпер актыўна нарошчвае абарончую магутнасць: у 2026 годзе яна плануе выдаткаваць на абарону 4,8% ВУП (каля 200 мільярдаў злотых, ці $54,7 мільярда). Краіна ўжо мае трэцюю па колькасці армію ў альянсе (216 тысяч вайскоўцаў) і збіраецца павялічыць яе яшчэ амаль на траціну ў наступныя дзесяць гадоў.
Акрамя таго, Польшча стварае ўласную «сцяну супраць дронаў» для абароны ад расійскіх пагроз. Першыя сістэмы плануюць увесці ў эксплуатацыю праз тры месяцы, а цалкам праект завершыцца праз два гады.
Цяпер чытаюць
Трагедыя з 30‑гадовай доктаркай са Старобіна — пайшла выдаляць зуб мудрасці і памерла23
Каментары