76-гадовая пенсіянерка трапіла пад хуткасную электрычку ў Буда-Кашалёўскім раёне
Пенсіянерка з Гомеля трапіла пад хуткасную электрычку ў Буда-Кашалёўскім раёне, паведаміў БелТА старшы памочнік пракурора Гомельскай вобласці па наглядзе за выкананнем заканадаўства на транспарце і ў мытных органах Сяргей Казакевіч.
Трагедыя на чыгунцы адбылася днём 7 верасня. Каля 14.00 цягніком міжрэгіянальных ліній бізнэс-класа №710 Мінск — Гомель на 234-м км перагону Буда-Кашалёўская — Уза смяротна траўмаваная гамяльчанка 1949 года нараджэння.
Пенсіянерка пераходзіла чыгуначныя рэйкі па аўтамабільным пераездзе ў раёне прыпынку Чараток.
«Жанчына пераходзіла з двума вялікімі торбамі, яна практычна бегла. Аднак не рэагавала на гукавыя сігналы вялікай гучнасці. Магчыма, спадзявалася праскочыць перад цягніком. Нягледзячы на ўжытае экстраннае тармажэнне, прадухіліць наезд не ўдалося. Пажылая жанчына загінула на месцы», — распавёў Сяргей Казакевіч.
Каментары