Ці пакараюць непрышпіленага Караева за парушэнне ПДР? Вось што адказалі ў ДАІ
«Фотажурналіст» Арцём Турлай апублікаваў у TikTok відэа са службовага аўтамабіля губернатара Гродзенскай вобласці Юрыя Караева. На ім відаць, што пасажыры аўто не прышпіленыя рамянямі бяспекі. «Люстэрка» звярнулася ў ДАІ Гродзенскага аблвыканкама, каб даведацца, якой будзе рэакцыя на парушэнне кіраўнікамі рэгіёна правілаў дарожнага руху.
Што адбылося
Відэа знутры службовага аўто зняў Арцём Турлай, які прадстаўляецца «фотажурналістам губернатара Гродзенскай вобласці», а таксама вядзе тэлеграм-канал «Пул 4 Регион». На кадрах — экс-кіраўнік МУС, а цяпер старшыня Гродзенскага аблвыканкама Юрый Караеў, яго першы намеснік Юрый Валяваты, а таксама кіроўца, твару якога не відаць.
Ролік прысвечаны таму, як Караеў чытае ў TikTok каментары да яго ўласных відэа. Але журналісты звярнулі ўвагу на іншы важны момант: здаецца, ніхто з людзей на момант здымкі не быў прышпілены рамянямі бяспекі.
Гэта заўважылі і каментатары пад відэа:
- «А прышпіліцца ў аўто яны ўсе не хочуць, як загадваюць ПДР, ці ім парушаць можна? І ДАІ, мабыць, не спыняе».
- «Чаму не прышпіленыя?»
- «Усё пачынаецца з кіраўніцтва. Не прышпільваюцца, парушаюць, ім усё можна, і дзецям іх…»
- «Не прышпіленыя, і, мабыць, зімовую гуму ставіць таксама не будуць».
«У любым выпадку кіраўніцтва будзе з ім звязвацца»
З пытаннем пра тое, ці будзе рэакцыя на паводзіны чыноўнікаў, журналістка «Люстэрка» патэлефанавала ў ДАІ Гродзенскага аблвыканкама як абураная несправядлівасцю грамадзянка.
Ёй удалося пагаварыць з намеснікам начальніка міжраённага рэгістрацыйна-экзаменацыйнага аддзела Аляксандрам Пабудзеем. Удакладніўшы, тэлефануе яна па каментар ці проста «паскардзіцца на губернатара», ён расказаў дэталі:
— У любым выпадку кіраўніцтва [Дзяржаўтаінспекцыі Гродна] будзе з ім [Караевым] звязвацца, і гэта [абмеркаванне сітуацыі] будзе праведзенае. < … > Магчыма, найбліжэйшым часам будзе пост ад яго з гэтай нагоды. Абвяржэнне гэтага. Магчыма, нават прабачэнні будуць.
— То-бок ужо займаліся гэтым пытаннем? Ці гэта вы так дапусцілі?
— Не, будзе кіраўніцтва [разбірацца], адпаведна, будзе ўсё праведзенае. І будзе прымацца рашэнне з гэтай нагоды. <…> Меры, вядома, будуць прынятыя.
Раней былі прэцэдэнты, калі чыноўнікаў прыцягвалі да адказнасці за парушэнне ПДР. Так, у сакавіку 2018 года ў эфір АНТ выйшаў сюжэт, прысвечаны Капыльшчыне і Году малой радзімы. Падчас здымак старшыня Капыльскага райвыканкама Анатоль Ліневіч і карэспандэнтка тэлеканала Вольга Сулімава некалькі разоў садзяцца ў аўтамабіль, але не прышпільваюцца рамянямі бяспекі. На заднім сядзенні можна заўважыць яшчэ і тэлеаператара, які таксама едзе непрышпіленым.
Адзін з тэлегледачоў скіраваў у ДАІ заяву, дзе выклаў сутнасць парушэння. Яму адказалі, што «па выніках праведзенай праверкі кіроўца і пасажыр аўтамабіля Hyundai прыцягнутыя да адміністрацыйнай адказнасці».
А вось штрафаваць Аляксандра Лукашэнку ў МУС не наважваліся. Той як мінімум двойчы трапляў на кадры журналістаў за рулём службовага Mercedes-Benz S-Class W221 (у 2015 і 2021 гадах) з непрышпіленым рамянём бяспекі.
Цяпер чытаюць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам
Каментары