У расійскай сям'і, дзе маці памерла на магіле ўдзельніка вайны ва Украіне, працягнуўся ланцужок смерцяў
Памёр старэйшы сын жанчыны з Забайкалля, якая тры дні таму памерла на магіле малодшага сына, які загінуў на вайне з Украінай. 28-гадовы Яўген Шарыпаў памёр 27 жніўня — на наступны дзень пасля пахавання маці, піша мясцовае выданне Chita.ru.
Гэта ўжо трэцяе пахаванне ў гэтай сям’і за месяц. Пасля развітання з маці на дарозе дадому маладому мужчыну стала кепска. Ён спыніўся ў сваякоў, якія некалькі разоў выклікалі хуткую дапамогу, але медыкі не прыехалі і прапанавалі чакаць фельчара. У выніку мужчына памёр ад язвы, якая, па словах суседзяў, абвастрылася на фоне моцнага стрэсу.
Сям’я ў свой час гэтага хлопца ўсынавіла, але заўсёды ставілася да яго як да роднага. Ён скончыў мясцовую школу і вучылішча, быў жанаты, жыў асобна, але рэгулярна наведваў бацькоў, асабліва пасля гібелі брата.
Цяпер у сям’і засталіся бацька-інвалід і два непаўналетнія сыны 15 і 16 гадоў. Пахаванне старэйшага сына адбудзецца 30 жніўня побач з магілай маці.
Каментары