У Жыровіцах аднаўляюць барочную царкву XVIII стагоддзя. Ад арыгінальнага помніка пакінулі толькі пяць брусоў
Праект «рэканструкцыі» Георгіеўскай царквы Свята-Успенскага Жыровіцкага манастыра прадугледжваў захаванне менш як паловы зрубу, але ў рэчаіснасці ад старога помніка не засталося амаль нічога.
Разыходжанне з праектам заўважыў тэлеграм-канал «Спадчына».
Рэканструкцыя Георгіеўскай царквы на мясцовых могілках, якая зводзіцца да таго, што яе разбіраюць да падмуркаў і збіраюць нанова, пачалася ў маі гэтага года, выклікаўшы шмат асцярог, што гэта чарговы акт вандалізму ад Рускай праваслаўнай царквы.
Праект, распрацаваны «Гроднаграмадзянпраектам» пад кіраўніцтвам Алены Счаснай, прадугледжваў захаванне менш чым паловы зруба — толькі 40%. Цалкам ва ўтыль спісваецца амаль увесь аўтэнтычны матэрыял: кроквенная сістэма даху, перакрыцці, канструкцыя купала, шалёўка, карнізы, адлівы, падлогі, лесвіца.
Але і ў выпадку са зрубам была прыпіска, што ў такім аб'ёме яго захаваюць толькі калі пры разборцы храма раптам не выявяцца «схаваныя дэфекты» ў тых брусах, якія хацелі паўторна выкарыстаць.
Цяпер, мяркуючы па апошніх фотаздымках, Георгіеўскую царкву ўзвялі нанова на поўную вышыню сцен і прыступілі да кроквеннай сістэмы даху.
Актывісты пабачылі, што пры адбудове царквы замест заяўленага ў праекце аб'ёму захавалі толькі пяць старых брусоў у апсіднай частцы царквы — яны кантрасна вылучаюцца на фоне светлых новых брусоў.
Узнікае парадокс карабля Тэсея — калі ўсе часткі аб'екта замяніць на новыя, ці застаецца аб'ект тым жа аб'ектам? Або мы назаўжды страцілі яшчэ адзін помнік барока, узяўшыся яго аднаўляць?
Цяпер чытаюць
Мільянер Варабей атрымаў права на забудову цэнтра Мінска — узамен за дарагую клініку для Лукашэнкі7
Каментары