«Не хацеў бы памерці на здымачнай пляцоўцы». Майкл Дуглас сыходзіць з кіно
80-гадовы амерыканскі акцёр, двойчы лаўрэат прэміі «Оскар» Майкл Дуглас абвясціў, што завяршае кінакар’еру.
Пра гэта акцёр распавёў падчас прэс канферэнцыі на кінафестывалі ў Карлавых Варах, дзе ён прадстаўляў адрэстаўраваны фільм Мілаша Формана «Палёт над гняздом зязюлі». Дуглас быў супрадзюсерам фільма, піша Бі-бі-сі.
Сваю апошнюю ролю, заснавальніка ЗША Бенджаміна Франкліна, ён сыграў у 2022 годзе ў серыяле «Франклін» на Apple TV+, які выйшаў на экраны ў 2024-м.
«У мяне была вельмі насычаная кар'ера. Цяпер я наўмысна не працаваў з 2022 года, бо зразумеў, што павінен спыніцца», — цытуе яго the Guardian.
«Я даволі шмат працаваў амаль 60 гадоў і не хацеў быць адным з тых людзей, якія паміраюць на здымачнай пляцоўцы», — дадаў акцёр. «Я вельмі рады ўзяць адпачынак. Але ў мяне няма нейкіх канкрэтных намераў. Калі здарыцца нешта асаблівае, я змагу вярнуцца», — сказаў Дуглас.
Ён таксама дадаў, што «цалкам шчаслівы» глядзець, як працуе яго жонка акторка Кэтрын Зэта-Джонс.
Ён таксама сказаў, што «спрабуе атрымаць добры сцэнар» для невялікага незалежнага фільма, але пажартаваў, што не гоніцца за працай, а яго гульня ў гольф паляпшаецца.
У 2010 годзе Дуглас прайшоў курс хіміятэрапіі і апраменьвання ад раку горла чацвёртай стадыі. У Карлавых Варах ён распавёў, што яму «пашанцавала» пазбегнуць аперацыі, падчас якой яму маглі выдаліць частку сківіцы і ён не змог бы граць далей.
На прэс-канферэнцыі Дуглас таксама пракаментаваў палітычную сітуацыю ў ЗША, сказаўшы, што адчувае, што яго краіна «фліртуе з аўтакратыяй».
Майкл Дуглас нарадзіўся ў сям'і выдатнага амерыканскага акцёра яўрэйска-беларускага паходжання Кірка Дугласа. Дзед і бабуля Майкла па бацькавай лініі, Гершэль і Бруня Даніловічы, былі габрэйскімі эмігрантамі з горада Чавусы. Маці — амерыканская актрыса Даена Дзіл.
Акцёр не адразу стаў вядомым, але спрадзюсаваная ім у 1975 годзе стужка Мілаша Формана «Палёт над гняздом зязюлі» з Джэкам Нікалсанам у галоўнай ролі атрымала пяць «Оскараў».
Сапраўднае прызнанне Дугласу прынесла прыгодніцкая камедыя «Раман з каменем» і яе працяг «Жамчужына Ніла», а таксама фільм «Вайна мужа і жонкі Роўз».
«Оскара» за найлепшую ролю ён атрымаў за стужку Олівера Стоўна «Уол-стрыт» 1987 года. Але, мабыць, найбольшую вядомасць акцёру прынёс «Асноўны інстынкт» з Шэран Стоўн.
Цяпер чытаюць
23‑гадовы ахоўнік з Астраўца загінуў за Расію на вайне. Паваяваў ён, відаць, каля месяца16
Каментары