Вынеслі прысуд групе магілёўцаў, якія спецыяльна калечылі сябе, каб атрымаць страхоўкі
Сямёра жыхароў Магілёўскай вобласці асуджаныя за страхавое махлярства, у выніку якога яны незаконна атрымалі больш за 420 тысяч рублёў.
З 2021 па 2024 год абвінавачаныя заключалі дамовы добраахвотнага страхавання ад няшчасных выпадкаў, а затым наўмысна наносілі сабе траўмы, імітуючы побытавыя здарэнні. Пасля фіктыўнага лячэння яны звярталіся па страхавыя выплаты.
Схема дзейнічала ў розных гарадах, і кожны з удзельнікаў атрымаў грашовую кампенсацыю за нібыта атрыманыя пашкоджанні. Следства ўстанавіла, што дзеянні фігурантаў былі старанна спланаваныя, а самі траўмы — не выпадковыя. Шкода страхавым арганізацыям склала больш за 420 тысяч рублёў.
Суд Ленінскага раёна Магілёва прызнаў усіх семярых вінаватымі.
Найбольш строгае пакаранне — 10 гадоў пазбаўлення волі ў калоніі строгага рэжыму са штрафам 700 базавых велічынь (каля 29 400 рублёў).
Найменшае пакаранне — 2 гады абмежавання волі ў выпраўленчай установе адкрытага тыпу. Астатнія ўдзельнікі атрымалі ад 2,5 да 8 гадоў пазбаўлення волі і таксама абавязаныя выплаціць штрафы.
Цяпер чытаюць
«Больш за 10 чалавек выехалі ў Еўропу — і гэта толькі з майго аддзялення». Рэаніматолаг з райцэнтра шчыра апісаў будні беларускай медыцыны4
Каментары