Трамп: Пуцін «разбурае Расію», не заключаючы з Кіевам пагадненне аб спыненні вайны
Прэзідэнт ЗША заявіў у панядзелак, што яго расійскі калега Уладзімір Пуцін «зрабіў бы сабе лепш», калі б скончыў вайну ва Украіне, дадаўшы, што Пуцін «не занадта добра пачуваецца», а Расія страціла мільён салдат, паведамляе «Голас Амерыкі».
«Мне трэба пагаварыць з прэзідэнтам Пуціным, нам трэба ўсё высветліць», — сказаў Трамп, размаўляючы з журналістамі ў Авальным кабінеце пасля падпісання выканаўчых указаў. — Расія большая [чым Украіна], у іх больш салдат, якіх можна страціць, але кіраваць краінай такім чынам — гэта дзіўна».
Ён таксама заявіў, што хоча ў хуткім часе сустрэцца з расійскім прэзідэнтам, аднак дата гэтай сустрэчы пакуль не вызначана.
«Большасць людзей думалі, што вайна скончыцца за адзін тыдзень, — сказаў Трамп пра вайну Расіі супраць Украіны, якая цягнецца амаль тры гады. — Я думаю, яму [Пуціну] было б лепш завяршыць гэтую вайну».
Трамп заявіў, што прэзідэнт Украіны Уладзімір Зяленскі хоча заключыць пагадненне для заканчэння канфлікту, а Уладзімір Пуцін «разбурае Расію», не заключаючы пагаднення для завяршэння вайны з Украінай.
«Зяленскі хоча заключыць пагадненне. Не ведаю, ці хоча гэтага Пуцін. Ён павінен заключыць пагадненне. Я думаю, ён разбурае Расію, не заключаючы пагаднення», — сказаў Трамп. Адказваючы на пытанне пра магчымасць зняцця санкцый з Расіі, Трамп адзначыў, што аддае перавагу мытам замест санкцый.
Між тым, Уладзімір Пуцін у панядзелак павіншаваў Дональда Трампа з пераабраннем на другі тэрмін. Пуцін выказаў гатоўнасць да абмеркавання важных глабальных пытанняў, сярод якіх працяглая вайна ва Украіне і пытанні, што тычацца ядзернай зброі.
Каментары