Супрацоўнік дзіцячага садка з Аўстраліі на працягу 20 гадоў гвалтаваў дзяцей
Ахвярамі педафіла сталі 73 дзіцяці з Аўстраліі і Італіі. Злачынца прызнаў сваю віну па 307 выпадках.
Як піша The Guardian, былы супрацоўнік дзіцячага садка Эшлі Грыфіт (Ashley Griffith) быў прысуджаны акруговым судом Квінсленда (Аўстралія) да пажыццёвага зняволення за сэксуальныя злачынствы супраць 73 дзяўчынак ва ўзросце да пяці гадоў, якія знаходзіліся пад яго апекай.
Ён прызнаў віну ў 307 эпізодах, сярод якіх 15 датычаць «паўторных сэксуальных кантактаў», 28 — згвалтаванняў, 190 — непрыстойных дзеянняў у дачыненні да дзяцей, якія знаходзіліся пад яго апекай, і 67 — стварэння матэрыялаў, звязаных з эксплуатацыяй дзяцей.
Сваю злачыннай дзейнасцю мужчына займаўся на працягу 20 гадоў (з 2003 па 2022 год) у 11 дзіцячых установах у Брысбене (сталіца штата Квінсленд у Астраліі) і адной у Пізе (Італія).
На камп'ютары Грыфіта следчыя знайшлі сістэматызаваныя файлы з фатаграфіямі дзетсадаўскіх груп, звесткамі пра дзяцей і відэазапісы яго злачынных дзеянняў. Мужчына пад псеўданімам Zimble з 2013 года загружаў свае запісы на форумы педафілаў у даркнэце.
Следчыя шукалі Zimble амаль дзесяць гадоў, пакуль у 2022 годзе не адбыўся прарыў: на адным з фотаздымкаў была заўважана коўдра пэўнага брэнду. Коўдры гэтага брэнду былі прададзены ў шэраг дзіцячых устаноў Квінсленда. Супаставіўшы спісы ўстаноў, якія набылі гэтыя коўдры, са спісамі іх супрацоўнікаў, следчыя змаглі выйсці на Эшлі Грыфіта.
Псіхіятрычная экспертыза дыягнаставала ў Грыфіта «педафільнае расстройства», але не выявіла іншых парушэнняў ці фактараў, якія маглі б растлумачыць яго дзеянні. Мужчына быў ацэнены як чалавек з высокім узроўнем сэксуальных дэвіяцый і высокай рызыкай паўтарэння злачынстваў.
Эксперты адзначылі, што Грыфіт не праяўляў эмпатыі да ахвяр і імкнуўся апраўдаць свае дзеянні, якія не спрабаваў спыніць. Акрамя таго, Грыфіт актыўна дзяліўся парадамі ў даркнэце пра тое, як здзяйсняць злачынствы супраць дзяцей, і сваёй стратэгіяй, заснаванай на пошуку «балансу паміж мінімізацыяй рызык і выкарыстаннем магчымасцяў».
На судзе некаторыя з бацькоў пацярпелых расказвалі, што пасябравалі з выхавацелем і прымалі яго ў сябе дома.
46-гадовы злачынца павінен адбыць мінімум 27 гадоў пазбаўлення волі, перш чым атрымаць права на ўмоўна-датэрміновае вызваленне. Акрамя таго, яму могуць быць выстаўленыя дадатковыя абвінавачванні.
Цяпер чытаюць
Лукашэнку стала кепска, калі ён даведаўся, чым дыхае народ2
Каментары