Supracoŭnik dziciačaha sadka z Aŭstralii na praciahu 20 hadoŭ hvałtavaŭ dziaciej
Achviarami piedafiła stali 73 dziciaci z Aŭstralii i Italii. Złačynca pryznaŭ svaju vinu pa 307 vypadkach.
Jak piša The Guardian, były supracoŭnik dziciačaha sadka Ešli Hryfit (Ashley Griffith) byŭ prysudžany akruhovym sudom Kvinślenda (Aŭstralija) da pažyćciovaha źniavoleńnia za seksualnyja złačynstvy suprać 73 dziaŭčynak va ŭzroście da piaci hadoŭ, jakija znachodzilisia pad jaho apiekaj.
Jon pryznaŭ vinu ŭ 307 epizodach, siarod jakich 15 datyčać «paŭtornych seksualnych kantaktaŭ», 28 — zhvałtavańniaŭ, 190 — nieprystojnych dziejańniaŭ u dačynieńni da dziaciej, jakija znachodzilisia pad jaho apiekaj, i 67 — stvareńnia materyjałaŭ, źviazanych z ekspłuatacyjaj dziaciej.
Svaju złačynnaj dziejnaściu mužčyna zajmaŭsia na praciahu 20 hadoŭ (z 2003 pa 2022 hod) u 11 dziciačych ustanovach u Bryśbienie (stalica štata Kvinślend u Astralii) i adnoj u Pizie (Italija).
Na kampjutary Hryfita śledčyja znajšli sistematyzavanyja fajły z fatahrafijami dzietsadaŭskich hrup, źviestkami pra dziaciej i videazapisy jaho złačynnych dziejańniaŭ. Mužčyna pad psieŭdanimam Zimble z 2013 hoda zahružaŭ svaje zapisy na forumy piedafiłaŭ u darknecie.
Śledčyja šukali Zimble amal dziesiać hadoŭ, pakul u 2022 hodzie nie adbyŭsia praryŭ: na adnym z fotazdymkaŭ była zaŭvažana koŭdra peŭnaha brendu. Koŭdry hetaha brendu byli pradadzieny ŭ šerah dziciačych ustanoŭ Kvinślenda. Supastaviŭšy śpisy ŭstanoŭ, jakija nabyli hetyja koŭdry, sa śpisami ich supracoŭnikaŭ, śledčyja zmahli vyjści na Ešli Hryfita.
Psichijatryčnaja ekśpiertyza dyjahnastavała ŭ Hryfita «piedafilnaje rasstrojstva», ale nie vyjaviła inšych parušeńniaŭ ci faktaraŭ, jakija mahli b rastłumačyć jaho dziejańni. Mužčyna byŭ acenieny jak čałaviek z vysokim uzroŭniem seksualnych devijacyj i vysokaj ryzykaj paŭtareńnia złačynstvaŭ.
Ekśpierty adznačyli, što Hryfit nie prajaŭlaŭ empatyi da achviar i imknuŭsia apraŭdać svaje dziejańni, jakija nie sprabavaŭ spynić. Akramia taho, Hryfit aktyŭna dzialiŭsia paradami ŭ darknecie pra toje, jak ździajśniać złačynstvy suprać dziaciej, i svajoj stratehijaj, zasnavanaj na pošuku «bałansu pamiž minimizacyjaj ryzyk i vykarystańniem mahčymaściaŭ».
Na sudzie niekatoryja z baćkoŭ paciarpiełych raskazvali, što pasiabravali z vychavacielem i prymali jaho ŭ siabie doma.
46-hadovy złačynca pavinien adbyć minimum 27 hadoŭ pazbaŭleńnia voli, pierš čym atrymać prava na ŭmoŭna-daterminovaje vyzvaleńnie. Akramia taho, jamu mohuć być vystaŭlenyja dadatkovyja abvinavačvańni.
Vialikaja hutarka z Franakam Viačorkam — pra kruhły stoł z Łukašenkam, pamyłki, chejtaraŭ i hałoŭnaje dasiahnieńnie26
Kamientary