Кіраўнік РПЦ паабяцаў расіянам вечнае жыццё ў выпадку гібелі ва Украіне і заклікаў маліцца за Пуціна
Расіяне, якія ўдзельнічаюць у вайне супраць Украіны, павінны памятаць пра вечнае жыццё, якое гарантавана ім у выпадку гібелі на полі бою.
Пра гэта патрыярх Маскоўскі і ўсёй Русі Кірыл напісаў у сваёй новай кнізе «За Русь Святую: патрыятызм і вера», з якой азнаёміліся «Ведамасці», пішуць The Moscow Times.
«Гэта ёсць жыццё вечнае — і ты ідзеш на подзвіг, аддаеш сваё фізічнае жыццё, але памятай: ты не загінеш, ты не памрэш, ты будзеш жыць», — адзначыў кіраўнік Рускай праваслаўнай царквы, спаслаўшыся на Евангелле ад Яна (Ян. 17:3).
Ён заклікаў «мабілізаваць» царкву разам з ваеннымі і палітычнымі сіламі Расіі, а расіян — маліцца за прэзідэнта РФ Уладзіміра Пуціна і салдат, якія ваююць ва Украіне.
Пры гэтым патрыярх назваў Расію міралюбнай краінай, падкрэсліўшы, што расійскі народ не імкнецца пачынаць войны з іншымі краінамі. Аднак, паводле яго слоў, чалавецтва няздольнае жыць без войнаў.
«Такой з'яўляецца заняпалай прырода чалавека, але мы можам і павінны мінімізаваць гуманітарную шкоду ад ваенных дзеянняў, калі гэтыя дзеянні пачаліся», — падкрэсліў патрыярх.
У ходзе ваенных дзеянняў, на думку кіраўніка РПЦ, неабходна ліквідаваць «д'ябальскія памкненні» ў свядомасці людзей, якія не імкнуцца да «духоўнага адзінства Святой Русі».
Адначасова патрыярх падкрэсліў, што Расія не прымае духоўных каштоўнасцяў тых, хто «прэтэндуе на сусветную ўладу», і становіцца «востравам свабоды» ад «бясоўшчыны». Ён таксама даў азначэнне паняццю «рускі свет», якое заключаецца ў «супольнасці святыняў» людзей розных этнасаў, веравызнанняў і культурных традыцый. Акрамя таго, патрыярх працытаваў Пуціна, які сказаў, што «рускі свет — гэта ўсе пакаленні нашых продкаў і нашчадкі, якія будуць жыць пасля нас».
Цяпер чытаюць
Дэлегатка КР Карпушонак пасля маўчання апублікавала відэа12
Дэлегатка КР Карпушонак пасля маўчання апублікавала відэа
Зніклы Анатоль Котаў быў партнёрам самага высокапастаўленага беларускага разведчыка, які пераехаў у Польшчу. Тут можа быць ключ да разгадкі яго знікнення7878
Каментары