У Беларусі зрабілі першыя фатаграфіі птушкі, якую раней тут фіксавалі толькі мёртвай
У кастрычніку ў Беларусі двойчы — пад Мінскам і пад Брэстам, — была адзначаная палярная крычка, піша тэлеграм-канал «Дзікая прырода побач».
Спачатку птушку ўбачыла і сфатаграфавала на Смалявіцкім вадасховішчы фатографка Іна Субоціна. Птушка лётала і рыбачыла з паўгадзіны, а потым знікла. Але фатографка вызначыла яе як звычайную рачную крычку, бо гэтыя віды вельмі падобныя.
Аднак праз некалькі дзён Іна даведалася, што палярную крычку адзначылі пад Масквой. Гэтыя птушкі з Арктыкі ляцяць на поўдзень звычайна над морам, таму над сушай рэдка трапляюцца птушкарам і арнітолагам.
«Тут я задумалася, пераглядзела фота і зразумела, што сфатаграфавала сапраўдную рэдкасць», — расказала птушкарка.
Пад Брэстам палярную крычку першымі назіралі Алег Аляксевіч, Кацярына Крупянкова і Таццяна Навачук.
Спачатку яны пабачылі, як шуляк-галубятнік лётае над шэрымі гусямі, потым паляцеў убок і з-за трыснягу сагнаў нешта светлае, амаль белае.
«Праз некалькі секунд я зразумела, што гэта крычка. Але яна была вельмі далёка, адразу было незразумела, якая. Потым дома, калі глядзелі фотаздымкі, Алег скінуў, што ў яго атрымалася. Я адразу адправіла Іне ягонае фота, і яна напісала, што гэта таксама палярная!» — расказала Кацярына.
На наступны дзень Алег Аляксевіч паехаў туды зноў, каб пераканацца, што гэта палярная крычка, і зрабіць лепшыя фота. Птушка была ўсё яшчэ там. Па гэтых фотаздымках ужо можна было сказаць дакладна, што гэта палярная крычка.
У Беларусі гэты від дагэтуль быў адзначаны толькі адзін раз: у 1990 годзе ў Віцебскай вобласці знайшлі мёртвую птушку з фінскім кольцам.
Палярная крычка гняздуецца ў асноўным у арктычнай тундры Еўропы, Азіі і Паўночнай Амерыкі. Зімаваць жа яна ляціць не ў цёплыя краіны, а ў Антарктыку і Субантарктыку. Гэта адзіная ў свеце птушка, якая кожны год мігруе з мораў аднаго полюса да другога.
За год яна пралятае ў сярэднім падчас міграцый 70 тысяч кіламетраў — гэта самая працяглая вядомая міграцыя ў жывёльным свеце.
Затрыманы ў Польшчы беларускі таксіст-шпіён быў сябрам «Паспалітага рушэння»14
Затрыманы ў Польшчы беларускі таксіст-шпіён быў сябрам «Паспалітага рушэння»
Расійскія і лукашэнкаўскія спецслужбы на фоне залёту дронаў у Польшчу правялі інфаатаку. Яе зладжанасць дае падставы думаць, што залёт быў спланаваны1515
Каментары