Беларуска матэматычна даказала, што купляць бульбу больш выгадна, чым вырошчваць. У каментарах гарачыя спрэчкі
Крысціна вельмі моцна не хацела ў чарговы раз ехаць капаць бульбу ў вёску да бацькоў мужа, а галаслоўныя запэўніванні ў духу «выгадней купіць на рынку» не дапамагалі. Прыйшлося звярнуцца да скрупулёзнай матэматыкі. Дзяўчына ўзялася за падлікі, заключыўшы заклад на 100 рублёў са свякрухай.
Дакладнымі разлікамі беларуска падзялілася ў тыктоку, заўважыў Onliner.
Вось што і на якія сумы трэба для пасадкі поля на 13 сотак:
- гной за 70 рублёў, які прыязджае растрэсці муж Крысціны, марнуючы на паліва 46,8 рубля;
- узворванне поля трактарам па тарыфе 4 рублі за сотку, гэта значыць усяго выходзіць 52 рублі;
- нарэзка радоў — 50 рублёў;
- сама пасадка 13 мяшкоў бульбы сажалкай абыходзіцца ў тыя ж 52 рублі (расцэнкі як у трактара). Саджаць прыязджаюць Крысціна з мужам (плюс 46,8 рубля за бензін) і брат мужа, у якога выдаткі на паліва больш (выходзіць 78 рублёў);
- летам трэба тройчы абганяць бульбу, адзін раз пратручваць траву і два-тры разы труціць жукоў. Абгонка — 3 рублі за сотку (для гэтага неабходны прыезд мужа). Разам: 117 рублёў. Выдаткі на хімію ад паразітаў — 20 рублёў, і зноў жа сюды ўключаем бензін для аўто;
- капаць бульбу прыязджаюць дзве сям'і (124,8 рубля — агульныя выдаткі на паліва). Разагнаць капалкай поле — 52 рублі.
Падбіўшы ўсе выдаткі, Крысціна вывела суму ў 808,2 рублі.
Што атрымлівае сям'я за гэты кошт? 45 мяшкоў бульбы, з іх прыдатнай да ўжывання ў ежу набярэцца толькі 22 мяшкі: занадта дробная пойдзе на корм курам, сярэдняя — на насенне. Крысціне ж з мужам дастанецца толькі 7 мяшкоў.
Дзяўчына ведае, дзе шукаць адборную бульбу гатунку «Скарб» па 1 рублю за кілаграм, ды і ў вёсцы суседзі аддадуць колькі заўгодна па такім жа кошце.
Выходзіць на 808 рублёў можна, адпаведна, купіць 808 кіло клубняў — у мяшках атрымліваецца 23 штукі па 35 кілаграм. Гэта значыць на цэлы адзін мяшок больш, чым удалося вырасціць сваімі намаганнямі, але па тым жа кошце.
У каментарах чакана счапіліся дзве крайнасці.
Палова карыстальнікаў Крысціну падтрымала, маўляў, нарэшце хтосьці ўзяў і змог даказаць бацькам, што бульбачка з лецішча не бясплатная.
Некаторыя дзяўчаты прапанавалі дадаць у затраты нават аднаўленне сапсаванага на агародзе манікюру.
Другая частка апелюе да векавых традыцый, чыстага паветра і таго, што час, праведзены з роднымі за карыснай справай, потым ні за якія рублі не купіш.
Зразумела, знайшліся і дзіркі ў падліках, і выпады пра нізкую ўраджайнасць поля ў свякрухі Крысціны («з 13 сотак павінна атрымацца мінімум 100 мяшкоў»).
А «эканамісты» панура заявілі, што калі ўсе пабягуць купляць бульбу, то кошт на яе ўзляціць да нябёсаў.
Начальнік міліцыі Брагіна страляў у сваю жонку. Яна цудам выжыла9
Каментары
Пусть тогда посчитает сколько еды еще они там съели и сколько водки свекр с мужем выпили