Грамадства147147

Дзмітрыеў просіць вярнуць паслоў у Мінск. «Санкцыі б’юць па людзях, а не па ўладзе»

Былы лідар кампаніі «Гавары праўду» Андрэй Дзмітрыеў апублікаваў артыкул, у якім крытыкуе ўспрыманне Беларусі як «сатэліта Расіі» і заклікае Еўропу «глядзець не назад, а наперад».

У 2020 годзе Андрэя Дзмітрыева зарэгістравалі ў якасці кандыдата на прэзідэнцкіх выбарах, разам з Ганнай Канапацкай і Сяргеем Чэрачнем. Фота: Наша Ніва 

Артыкул Андрэя Дзмітрыева апублікаваны на старонках анлайн-часопіса «IPG — Міжнародная палітыка і грамадства», які выдаецца нямецкім Фондам імя Фрыдрыха Эберта.

Кандыдат-спойлер на прэзідэнцкіх выбарах 2020 года адзначае, што, «нягледзячы на палітычны крызіс, тры гады рэпрэсій і вайну ля межаў Беларусі, многія людзі працягваюць спадзявацца на будучыню, дзе паважаюцца правы чалавека і існуе свабода выказвання меркаванняў».

Па словах палітыка, «беларусы ўжо прайшлі сваю рэвалюцыю ў 2020 годзе. Яна адбылася ў сэрцах і свядомасці людзей. Цяпер народ праходзіць складаны шлях да перамен, якія павінны стабілізаваць сітуацыю і прывесці да жыцця без насілля і новых узрушэнняў».

«І на гэтым шляху ён варты не шкадавання, а поўнай падтрымкі», — піша Дзмітрыеў.

На погляд палітыка, «беларусы хочуць мірных перамен, якія дазволяць вызваліць палітвязняў і стварыць умовы для дыялогу паміж грамадствам і ўладай, а таксама спынення ізаляцыі краіны».

Сам Дзмітрыеў быў асуджаны на паўтара года зняволення па палітычных матывах, адбыў свой тэрмін і выйшаў на свабоду.

Ён адзначае важнасць таго, каб Еўропа бачыла Беларусь «як незалежную дзяржаву» і «глядзела не назад, а наперад, грунтуючыся на сваіх каштоўнасцях і мэтах».

«Мэта — пабудова дэмакратычнай Беларусі, надзейнага партнёра ў рэгіянальнай бяспецы».

Аўтар сцвярджае, што «для большасці ў краіне крайне зняважлівы погляд на Беларусь як «сатэліта» Расіі і тым больш акупаваную тэрыторыю. Гэта абсалютна не адпавядае рэчаіснасці».

«Народ не хоча быць разменнай манетай у геапалітычных гульнях, а імкнецца да таго, каб Беларусь успрымалі як незалежную і паважаную дзяржаву», — адзначае аўтар і нагадвае пра неабходнасць «узмацнення незалежнасці і стварэння ўмоваў для нармальнага развіцця грамадзянскай супольнасці».

Нагадаем, што пасля 2021 года ў Беларусі былі ліквідаваныя ўсе незалежныя грамадскія арганізацыі, а кіраўнікі ўсіх вялікіх нацыянальных НДА або сталі аб'ектам крымінальнага пераследу, або пакінулі краіну. Сярод палітзняволеных — сусветна вядомы праваабаронца, лаўрэат Нобелеўскай прэміі міру Алесь Бяляцкі.

«Беларусам патрэбныя партнёры, якія ўспрымаюць іх як перспектыўнага саюзніка, а не праблему», — дадае Дзмітрыеў.

Санкцыі супраць лукашэнкаўцаў б’юць па людзях, а не па ўладзе, мяркуе Андрэй Дзмітрыеў. На фота: Аляксандр Лукашэнка ў Маскве 9 кастрычніка 2024 года

Якіх крокаў ад Еўропы чакае Дзмітрыеў

Аўтар заклікае да канкрэтных крокаў, якія б вялі да вызвалення палітвязняў, спынення рэпрэсій і стварэння ўмоваў для палітычнай размарозкі.

Адным з такіх крокаў ён бачыць вяртанне заходніх дыпламатычных місій у Мінск.

«Гэта не тычыцца прызнання Лукашэнкі, а прызнання права беларусаў на сваю дзяржаву і таго, што беларусы — гэта частка еўрапейскай прасторы», — аргументуе Дзмітрыеў.

Ён звяртае ўвагу на негатыўны ўплыў санкцый. На яго думку, яны падштурхоўваюць іх да арыентацыі на Усход і аслабляюць сувязі з Еўропай.

У той жа час, піша Андрэй Дзмітрыеў, «беларусы не хочуць цалкам аддаляцца ад Еўропы — яны шукаюць баланс, які дазволіць ім заставацца часткай еўрапейскай прасторы і не стаць удзельнікамі вайны».

Андрэй Дзмітрыеў прапануе, каб падтрымка Еўропы была накіраваная на ўмацаванне грамадзянскай супольнасці і дапамогу беларусам у захаванні іх еўрапейскай ідэнтычнасці.

«Для многіх еўрапейская ідэнтычнасць — гэта не толькі геапалітычны выбар, але і сімвал нармальнага жыцця, дзе паважаюць правы чалавека і ёсць магчымасці для самаразвіцця», — падкрэслівае Дзмітрыеў.

Важным ён лічыць наяўнасць еўрапейскіх праграм для студэнтаў і маладых прафесіяналаў з Беларусі, адукацыйных абменаў і праектаў, накіраваных на развіццё мясцовых ініцыятыў у краіне.

Усе пералічаныя крокі, на яго думку, дапамогуць аднавіць у беларусаў «пачуццё агульнасці і адзінства».

«Падтрымка звонку павінна выглядаць не як умяшанне, а як дапамога ў захаванні сувязі з Еўропай і інтэграцыі ў культурную і эканамічную прастору. Чым больш такіх сувязяў удасца стварыць, тым мацнейшымі будуць дэмакратычныя памкненні ўнутры краіны і тым цяжэйшым будзе ўладам ізаляваць Беларусь ад знешняга свету», — мяркуе аўтар.

«Ва ўмовах пастаяннага надзвычайнага становішча, ціску і страху (…) беларусы не здаюцца. Яны імкнуцца захаваць свае прынцыпы і каштоўнасці: міралюбнасць, працавітасць, годнасць, веру ў будучыню сваёй краіны. І гэта заслугоўвае павагі і падтрымкі — як з боку Еўрапейскага саюза, так і ўсяго Захаду», — рэзюмуе Дзмітрыеў.

Каментары147

  • Агентура i пасобнiкi лукашэнкi
    11.10.2024
    Усiх падключылi, пазЬняка, дзмiтрыева..
  • Ботам
    11.10.2024
    Можа яго адсідка, як і Васкнасенскага была ліпавай? Наратывы лукашэнкаўскай прапаганды ён паўтарае такія ж.
  • Запеў салаўём
    11.10.2024
    Даўно, відаць, Дзмітрыеву "беларусы" гумовую палку ў задні праход не ўстаўлялі.

Цяпер чытаюць

Ці сапраўды «Авія Мол» такі жахліва велізарны, як яго апісваюць?

Ці сапраўды «Авія Мол» такі жахліва велізарны, як яго апісваюць?

Усе навіны →
Усе навіны

Арыштаваны каліновец Васіль Грачыха19

КДБ арыштаваў падазронага актывіста Паўла Бялюціна. У якой краіне гэта адбылося, невядома12

Сэкс-цацкі і DHL: як Расія з дапамогай блатных разгортвала дыверсійную сетку ў Еўропе1

«Гучыць не так ужо шмат, але гэта вельмі шмат». Трамп выказаўся пра пуцінскае трохдзённае перамір'е2

АПЕК+ рэзка павялічвае здабычу нафты. Гэта ўдарыць па расійскім бюджэце4

У рэчыцкім парку ў гонар лётчыкаў часоў вайны паставілі цывільны самалёт 35-гадовага ўзросту3

Ксяндза Акалатовіча перавялі ў калонію ў дзень святкавання Вялікадня1

Прапагандысты анансавалі інтэрв'ю з усімі палякамі, асуджанымі ў Беларусі за шпіянаж4

Наколькі ўсё кепска з эканомікай Кітая? Пекін схаваў усю статыстыку, якая магла б даць адказ на гэтае пытанне7

больш чытаных навін
больш лайканых навін

Ці сапраўды «Авія Мол» такі жахліва велізарны, як яго апісваюць?

Ці сапраўды «Авія Мол» такі жахліва велізарны, як яго апісваюць?

Галоўнае
Усе навіны →

Заўвага:

 

 

 

 

Закрыць Паведаміць