«Дзякуй за тыя «БелАЗы». У Крывым Рогу расказалі, як БелАЗы дапамаглі адбіць расійскі наступ
Кіраўнік Крыварожскай ваеннай адміністрацыі Аляксандр Вілкул у тэлеграм-канале расказаў, як два гады таму, у пачатку расійскага ўварвання стварылі барыкаду з БелАЗаў, каб спыніць расійскую вайсковую тэхніку.
«Менавіта ў гэты дзень два гады таму калона з 300 адзінак варожай тэхнікі пачала рух у бок Крывога Рога. 150 былі адрэзаны нашымі верталётамі ля Баштанкі, 150 дайшлі да Новага Буга. А на Мікалаеўскім кірунку два БТРы варожай выведкі сутыкнуліся з замініраванымі БелАЗамі», — напісаў ён.
Ён асобна падзякаваў Нова-Крыварожскаму горна-абагачальнаму камбінату за тыя БелАЗы.
За два гады да пачатку поўнамаштабнай вайны Расіі супраць Украіны кампанія «АрселорМітал Крывы Рог», якой належыць Нова-Крыварожскі горна-абагачальны камбінат, набыла пяць 136-тонных самазвалаў БелАЗ, піша EX-PRESS.BY.
Выданне нагадвае, што ўкраінскі Крывы Рог стаў горадам-пабрацімам Жодзіна ў 2018 годзе. У жніўні 2020-га яго дэпутаты заклікалі гарсавет афіцыйна звярнуцца да кіраўніцтва Жодзіна і адміністрацыі галоўнага прадпрыемства з просьбай выканаць умовы мірных пратэстоўцаў.
5 сакавіка 2022 года на пазачарговай сесіі Крыварожскага гарадскога савета дэпутаты прагаласавалі за тое, каб разарваць якія-небудзь адносіны з Жодзінам.
Каментары
о. ,,наши,, заработали себе на коттеджик...