На фестывалі Pradmova ўручылі прэміі імя Алеся Адамовіча і Францішка Багушэвіча
У нядзелю на фестывалі інтэлектуальнай кнігі Pradmova ў Беластоку былі абвешчаны імёны лаўрэатаў дзвюх прэмій Беларускага ПЭНа — прэміі імя Алеся Адамовіча, якая вылучае аўтараў і аўтарак найлепшых публіцыстычных твораў, прысвечаных актуальным праблемам сучаснасці, і прэміі імя Францішка Багушэвіча, якая традыцыйна ўручаецца за выдатную гістарычную прозу, паведамляе Reform.by.
Так, пераможцай прэміі імя Алеся Адамовіча стала Ганна Кандрацюк за кнігу «У прысценку старога лесу. Гісторыі людзей з Белавежскай пушчы». Журы сфармулявала адметнасць твору аўтаркі тыднёвіка беларусаў Польшчы «Ніва» наступны чынам — «за актуалізацыю традыцый еўрапейскага рэпартажу». «У прысценку старога лесу» — гэта зборнік рэпартажаў, якія Ганна Кандрацюк піша па Беласточчыне з 1990-х гадоў. Паводле журналісткі, кніга — гэта падарожжа праз час і прастору.
Гэтаксама прэміяй імя Алеся Адамовіча была ганаравана кніга турэмных апавяданняў Максіма Знака «Зэкамерон», якую беларускі юрыст напісаў у зняволенні. «За чалавечую годнасць, свабоду думкі і творчасці ў нечалавечых умовах» — так гучала абгрунтаванне журы вылучыць твор.
Пераможцай жа прэміі імя Францішка Багушэвіча была названая гісторык і даследчыца Таццяна Астроўская.
Сёлета манаграфія аўтаркі «Культура і супраціў. Iнтэлігенцыя, іншадумства і самвыд у Савецкай Беларусі (1968—1988)» была таксама адзначаная прэміяй Міжнароднага кангрэса даследчыкаў Беларусі за найлепшыя навуковыя публікацыі. Даследаванне Таццяны Астроўскай прысвечана культурніцкаму змаганню з аўтарытарызмам у 1960-я — 1980-я гады.
Прэмія імя Францішка Багушэвіча — штогадовая літаратурная прэмія, заснаваная ў 1994 годзе. Яна традыцыйна ўручаецца за выдатную гістарычную прозу аўтарам і аўтаркам кніг, што спрыяюць абуджэнню гістарычнай свядомасці і нацыянальнай незалежнасці чытачоў.
Цяпер чытаюць
Соф'я Сапега: Пратасевіч нагаварыў на мяне цэлы том крымінальнай справы11
Соф'я Сапега: Пратасевіч нагаварыў на мяне цэлы том крымінальнай справы
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары