У выміраючым палескім райцэнтры пабудуюць мега-РАУС са спартыўнымі пляцоўкамі, цірам і ІЧУ
У Петрыкаве збіраюцца патраціць 5 млн долараў на пабудову новага будынка для мясцовай міліцыі, піша «Флагшток».
Гомельскае абласное УКБ праводзіць выбар генеральнай праектнай арганізацыі на ўзвядзенне комплексу будынкаў і збудаванняў Петрыкаўскага РАУС. Для яго будаўніцтва выдзелена тэрыторыя плошчай 1,63 га.
У двухпавярховым адміністрацыйным будынку агульнай плошчай 2,9 тыс. кв. м плануюць размясціць: інспекцыю па справах непаўналетніх, крымінальна-выканаўчую інспекцыю, аператыўна-дзяжурную службу, аддзел па грамадзянстве і міграцыі, аддзел ДАІ.
Адміністрацыйны будынак прызначаны для працы 93 супрацоўнікаў. Акрамя працоўных кабінетаў, тут размесцяць музей, спартзалу, залу для нарад на 94 чалавекі і іншыя дапаможныя памяшканні.
Непасрэдна ў гэтым жа будынку будзе размешчаны і ізалятар часовага ўтрымання. У ІЧУ будзе 8 камер, прызначаных для размяшчэння 24 чалавек, а таксама аднамесныя карцар і ізалятар.
На тэрыторыі комплексу таксама размесцяць гаражы для грузавога і легкавога спецтранспарту, стаянкі для канфіскаваных транспартных сродкаў, цір, пляц, дзве спартыўныя пляцоўкі і іншыя дапаможныя збудаванні.
Гэты РАУС стане найбуйнейшым міліцэйскім будынкам у раённым горадзе Гомельскай вобласці. Каштарысная вартасць будаўніцтва комплексу складае 16,1 млн беларускіх рублёў, што на сённяшні дзень складае амаль 5 млн даляраў. Гэта ў 2,5 разы больш, чым будаўніцтва будынка суда ў Навабеліцкім раёне ў 2021 годзе.
У Петрыкаве жыве каля 10 тысяч чалавек. Будаўніцтва вялізнага міліцэйскага комплексу адбудзецца ў фактычна выміраючым раёне. Тут зафіксавана найбольш істотнае скарачэнне колькасці насельніцтва ў Гомельскай вобласці ў 2022 годзе: мінус 2,6 працэнта.
Прычынай будаўніцтва новага РАУС мог стаць запуск у Петрыкаве горна-абагачальнага комплексу на 1719 працоўных месцаў. Як паказалі пратэсты 2020 года, маладыя работнікі прыбытковых прадпрыемстваў уяўляюць патэнцыйную небяспеку для рэжыму Лукашэнкі, піша выданне.
Учора Мінск зноў затапіла. Чаму сталіца не гатовая да дажджоў?4
Каментары