U vymirajučym paleskim rajcentry pabudujuć mieha-RAUS sa spartyŭnymi placoŭkami, ciram i IČU
U Pietrykavie źbirajucca patracić 5 młn dołaraŭ na pabudovu novaha budynka dla miascovaj milicyi, piša «Fłahštok».
Homielskaje abłasnoje UKB pravodzić vybar hienieralnaj prajektnaj arhanizacyi na ŭźviadzieńnie kompleksu budynkaŭ i zbudavańniaŭ Pietrykaŭskaha RAUS. Dla jaho budaŭnictva vydzielena terytoryja płoščaj 1,63 ha.
U dvuchpaviarchovym administracyjnym budynku ahulnaj płoščaj 2,9 tys. kv. m płanujuć raźmiaścić: inśpiekcyju pa spravach niepaŭnaletnich, kryminalna-vykanaŭčuju inśpiekcyju, apieratyŭna-dziažurnuju słužbu, adździeł pa hramadzianstvie i mihracyi, adździeł DAI.
Administracyjny budynak pryznačany dla pracy 93 supracoŭnikaŭ. Akramia pracoŭnych kabinietaŭ, tut raźmieściać muziej, spartzału, zału dla narad na 94 čałavieki i inšyja dapamožnyja pamiaškańni.
Niepasredna ŭ hetym ža budynku budzie raźmieščany i izalatar časovaha ŭtrymańnia. U IČU budzie 8 kamier, pryznačanych dla raźmiaščeńnia 24 čałaviek, a taksama adnamiesnyja karcar i izalatar.
Na terytoryi kompleksu taksama raźmieściać haražy dla hruzavoha i lehkavoha śpiectranspartu, stajanki dla kanfiskavanych transpartnych srodkaŭ, cir, plac, dźvie spartyŭnyja placoŭki i inšyja dapamožnyja zbudavańni.
Hety RAUS stanie najbujniejšym milicejskim budynkam u rajonnym horadzie Homielskaj vobłaści. Kaštarysnaja vartaść budaŭnictva kompleksu składaje 16,1 młn biełaruskich rubloŭ, što na siońniašni dzień składaje amal 5 młn dalaraŭ. Heta ŭ 2,5 razy bolš, čym budaŭnictva budynka suda ŭ Navabielickim rajonie ŭ 2021 hodzie.
U Pietrykavie žyvie kala 10 tysiač čałaviek. Budaŭnictva vializnaha milicejskaha kompleksu adbudziecca ŭ faktyčna vymirajučym rajonie. Tut zafiksavana najbolš istotnaje skaračeńnie kolkaści nasielnictva ŭ Homielskaj vobłaści ŭ 2022 hodzie: minus 2,6 pracenta.
Pryčynaj budaŭnictva novaha RAUS moh stać zapusk u Pietrykavie horna-abahačalnaha kompleksu na 1719 pracoŭnych miescaŭ. Jak pakazali pratesty 2020 hoda, maładyja rabotniki prybytkovych pradpryjemstvaŭ ujaŭlajuć patencyjnuju niebiaśpieku dla režymu Łukašenki, piša vydańnie.
Kamientary