«Дзякуйце за гэта сваёй Літве». У Беларусь не прапусцілі аўтобус з Вільні — пасажыраў высадзілі пасярод ночы
Чытачка выдання «Люстэрка» Кацярына расказала пра свайго сябра, які ўвечары 7 ліпеня ехаў з Вільні ў Мінск. Паездка прайшла з прыгодамі: аўтобус спынілі на беларускай мяжы, пасажыраў пратрымалі некалькі гадзін. А пасля іх увогуле высадзілі і прапанавалі дабірацца сваім ходам.
«Натоўп людзей, з дзецьмі, з рэчамі, проста ў лесе»
Аўтобусы кампаніі PL Int ездзяць з Вільні ў Мінск і назад. 7 ліпеня аўтобус выехаў са сталіцы Літвы паводле раскладу ў 17:00 і мусіў быць у Мінску ў 21:00. Але ўсё пайшло не па плане, пераказвае Кацярына (тут і далей імёны змененыя) гісторыю свайго сябра.
«На літоўскай мяжы ўсё было добра, прапусцілі без праблем. На беларускай пачалося: супрацоўнікі сказалі чакаць, кудысьці пайшлі, і ў выніку аўтобус прастаяў чатыры гадзіны! Потым яны вярнуліся і сказалі чакаць яшчэ», — тлумачыць дзяўчына.
Каля поўначы да пасажыраў падышоў памежнік і сказаў выходзіць разам з рэчамі. Пункт пропуску «Каменны Лог» не прызначаны для пераходу мяжы пешшу, але супрацоўнік прайшоў яго разам з пасажырамі.
«Як распавядаў сябар, памежнік сказаў, што аўтобус не прапускаюць, а людзі далей хай як хочуць. І дадаў: «Дзякуйце за гэта сваёй Літве». І вось стаіць натоўп людзей, з дзецьмі, з рэчамі, проста ў лесе за пагранпунктам! Сяк-так людзі пачалі дамаўляцца і заказваць таксі, хтосьці тэлефанаваў сябрам», — адзначае Кацярына.
Са слоў дзяўчыны, прычынай спынення аўтобуса стала прэтэнзія памежнікаў да кіроўцы — той нібыта вёз кантрабанду. Хоць сам мужчына тлумачыў, што гэта стандартныя запчасткі на выпадак паломкі транспарту.
Яшчэ адна чытачка «Люстэрка» Вольга ў тую ноч забірала свайго мужа з мяжы: ён таксама ехаў гэтым рэйсам.
«Памежнікі сказалі, што ўнутры аўтобуса была кантрабанда, — пацвярджае яна словы Кацярыны. — Чаго менавіта, я не ведаю. Усяго было 56 пасажыраў, і, натуральна, усе абураліся. Цікавіліся, што рабіць. А людзей шмат, усе з рэчамі. У адказ ад начальніка змены пачулі толькі: маўляў, дабірайцеся самі, усе пытанні да перавозчыка. Кіроўцу аўтобуса пасажыры больш не бачылі».
Што сказалі ў кампаніі і на мяжы
У кампаніі PL Int «Люстэрку» расказалі, што такі інцыдэнт на мяжы сапраўды быў. Са слоў прадстаўніка перавозчыка, кіроўцу спынілі нібыта праз кантрабанду:
«Так, было такое затрыманне [аўтобуса]. У аўтобусе знайшлі нейкія рэчы, якія нельга было везці. Там былі запчасткі. Чаму праз гэта затрымалі … Незадэклараванае, атрымліваецца, было. З кіроўцам нічога [не здарылася], яго вярнулі назад. Потым ён зноў паехаў у Беларусь, і больш праблем ніякіх не было.
Такое з намі першы раз, але пасля гэтага інцыдэнту наступстваў ніякіх не было. У пасажыраў былі прэтэнзіі, але ўсё ўдалося вырашыць: вярнулі грошы».
Па каментар да прадстаўніка Смаргонскай памежнай групы звярнуліся журналісты блога «Людзі».
«Была такая сітуацыя. У дачыненні да грамадзян праведзены памежны кантроль, людзі перасеклі мяжу. Пасля прапановы ім дапамогі па пасадцы ў аўтобусы сказалі, што едуць самастойна.
З нагоды затрымкі аўтобуса звяртайцеся да супрацоўнікаў мытні, — параіў дзяжурны. — З боку памежнікаў людзям была прапанавана пасадка ў аўтобусы, якія ехалі праз дзяржаўную мяжу».
Атрымаць аператыўны каментар ад прадстаўніка мытнага кантролю ў пункце пропуску «Каменны Лог» у журналістаў блога не выйшла.
Цяпер чытаюць
Беларускія дальнабойшчыкі ўсё часцей выбіраюць для працы Германію замест Польшчы і Літвы. Расказваюць пра заробкі3
Каментары