Эстонія зрабіла істотнае выключэнне для студэнтаў, дактароў і навукоўцаў з Беларусі
Урад Эстоніі ўхваліў выключэнне з санкцыйнага рэжыму, у адпаведнасці з якім студэнты, дактары і навукоўцы, якія прыбылі ў Эстонію да пачатку поўнамаштабнай агрэсіі Расіі супраць Украіны, могуць хадайнічаць аб новым дазволе на жыхарства.
Выключэнне не азначае аўтаматычнага атрымання дазволу на жыхарства. Кожнае хадайніцтва будзе разгледжанае асобна, у кожным выпадку ўлады будуць ацэньваць, ці ёсць у чалавека падставы для атрымання дазволу на жыхарства, піша Delfi.
У санкцыйным рэжыме будзе зробленае вузка накіраванае выключэнне для тых, хто знаходзіцца ў Эстоніі на законных падставах навучэнцаў, дактароў, стаматолагаў і акадэмічных работнікаў з ліку грамадзян Расіі і Беларусі, якім будзе прадастаўленая магчымасць атрымаць дазвол на жыхарства для больш працяглага знаходжання ў Эстоніі.
Выключэнне ў санкцыйным рэжыме тычыцца тых людзей, якія прыехалі ў Эстонію вучыцца або працаваць да пачатку поўнамаштабнай агрэсіі Расіі супраць Украіны, здалі ўсе неабходныя экзамены эстонскай мовы або прайшлі эстонамоўную вучэбную праграму і валодаюць эстонскай мовай як мінімум на ўзроўні B2. На акадэмічных работнікаў патрабаванне валодаць мовай не распаўсюджваецца.
У 2022/2023 навучальным годзе ў эстонскіх ВНУ вучыцца 298 грамадзян Расіі і Беларусі, на якіх распаўсюджваецца санкцыйны рэжым. Выключэнне распаўсюдзіцца ў першую чаргу на тых 78 студэнтаў, якія завяршаюць навучанне па эстонамоўнай праграме.
Выключэнне для студэнтаў, якія валодаюць эстонскай мовай і заканчаюць тут універсітэт, не наносіць шкоды асноўнай мэце санкцый — абмежаваць прыбыццё ў Эстонію новых грамадзян Расіі і Беларусі, паколькі выключэнне робіцца толькі для тых, хто ўжо знаходзіцца ў Эстоніі.
Паводле звестак Дэпартамента здароўя, у 2022-2023 годзе ў Эстоніі ў якасці дактароў былі зарэгістраваныя 9 чалавек, якія прыбылі на працу з Расіі, і 6 чалавек з Беларусі, а таксама адзін стаматолаг з Расіі і 3 стаматолагі з Беларусі.
Па ацэнцы Міністэрства сацыяльных спраў, неабходна захаваць усіх дактароў і стаматолагаў, якія, прыбыўшы на працу ў Эстонію з іншай дзяржавы, ужо прайшлі экзамен на прафесійную адпаведнасць, здалі экзамен па эстонскай мове і ўнесеныя ў рэгістр Дэпартамента здароўя з правам працаваць доктарам ці стаматолагам. У гэтым выпадку краіна паходжання значэння не мае.
Цяпер чытаюць
«Лена 20 рублёў» узялася за старое: знакамітая махлярка зноў разводзіць даверлівых беларусаў10
Каментары