З 1 красавіка ў анлайн-кінатэатры беларускага кіно Vodblisk з'явіцца новы фільм
1 красавіка ў анлайн-кінатэатры беларускага кіно Vodblisk з’явіцца фільм Юлі Шатун «Межы». Гэта ўжо другі беларускі фільм, які стане даступным на платформе.
Беларуская рэжысёрка Юля Шатун стала для многіх сапраўдным кінаадкрыццём 2017 года. Поўнаметражны дэбютны фільм рэжысёркі «Заўтра» ў 2018 годзе заваяваў адразу чатыры ўзнагароды на буйным Міжнародным кінафестывалі ў Марселі. А ў 2019-м Юля зняла фільм «Межы» — гэта аўтарскае, вельмі арыгінальнае па форме паэтычнае кінаэсэ на тэму пошукаў сваёй і чужой, асабістай і мастацкай ідэнтычнасці ў зменлівым свеце.
Ідэя фільма нарадзілася ў цягніку, там жа пачынаецца і кінагісторыя. Гэта фільм-падарожжа па чатырох гарадах, а таксама па сучаснасці і мінулым, бо выкарыстоўваюцца кадры, знятыя рэжысёркай у сучасны перыяд і яе бацькам 25 гадоў таму. Яны зліваюцца ў адно галасавое паведамленне невядомаму чалавеку і так ці інакш прыводзяць нас да нейкіх бачных ці нябачных межаў у геаграфіі, гісторыі ці кінематаграфіі.
Дакументальная стужка «Межы» дэманстравалася ў першай за гісторыю існавання беларускай праграме фестывалю кіно Паўночных і Балтыйскіх краін «Паўночнае ззянне» ў 2020 годзе.
Анлайн-кінатэатр беларускага кіно Vodblisk таксама заснаваны ў лютым камандай «Паўночнага ззяння». Новыя стужкі ў ім дадаюцца штомесяц. Каб глядзець фільмы ў беларускім анлайн-кінатэатры, трэба зарэгістравацца. Доступ да любога фільма каштуе 5 даляраў і выдаецца на 30 дзён, за гэты час фільм можна пераглядзець колькі заўгодна разоў.
Першы фільм з'явіўся на гэтай платформе 1 сакавіка. Ім стала стужка «Мая бабуля з Марса» — дакументальнае кіно пра бабулю рэжысёра ў анексаваным Крыме, знятае Аляксандрам Міхалковічам.
Цяпер чытаюць
Легендарная журналістка Любоў Лунёва расказала пра Віктара Лукашэнку і аднакурснікаў, стварэнне «Вясны» і палітычны бамонд17
Каментары