Платформа «Новая Беларусь» запускае пілотны праект па лічбавым самакіраванні для беларусаў у Літве і Польшчы
Вось у чым яго сутнасць.
Беларусы, што жывуць у Польшчы і Літве, могуць самі запоўніць падатковую дэкларацыю і фундаваць пэўны працэнт сваіх падаткаў на дабрачыннасць — 1,5% у Польшчы і 1,2% у Літве.
Гэта прыкладна 20—30 еўра паводле сярэдняга заробку ў гэтых краінах.
«Новая Беларусь» прапануе выбраць атрымальнікамі гэтых падаткаў беларускія арганізацыі за мяжой і пасля з імі вырашыць, як канкрэтна будуць траціцца грошы.
«У дзяржаве ўлада ідзе ад грамадзянскай супольнасці, — піша каманда «Новай Беларусі». — Менавіта людзі вырашаюць, хто будзе іх прадстаўляць і на што маюць ісці іхнія агульныя грошы. А беларуская супольнасць гатовая да дэмакратыі? Мы перакананыя, што так. Каб пацвердзіць гэта — запускаем пілотны праект па лічбавым самакіраванні.
Мы задумалі гэты праект, каб праілюстраваць усім і сабе самім, што беларусы і беларускі гатовыя да дэмакратыі, да ўдзелу ў эканамічных і палітычных працэсах, гатовыя браць на сябе адказнасць.
За лета пройдзе абмеркаванне фундатарамі і фундатаркамі найбольш істотных напрамкаў для дапамогі. Вы самі зможаце прапаноўваць кірункі, супольна абмеркаваць, прагаласаваць, вырашыць і пракантраляваць, куды пойдуць сродкі. Праз тое, што ўсё будзе праходзіць анлайн, мы падзелімся інфармацыяй пра этапы і вынікі працэсу».
Каб далучыцца да праекта, трэба самастойна запоўніць падатковую дэкларацыю і абраць партнёрскія ўстановы «Новай Беларусі» ў Польшчы ці Літве ў якасці атрымальнікаў вашага працэнта на дабрачыннасць.
Калі не запаўняць дэкларацыю, то гэты адсотак спішацца аўтаматычна на рахунак iншай рандомнай арганізацыі.
Вясной каманда плануе сабраць фундатараў і фундатарак на платформе, летам вызначыць праблемы, якія варта вырашыць, і восенню накіраваць сродкі на добрую справу.
Як далучыцца да праекта?
Крок першы
Калі вы плаціце падаткі ў Польшчы ці Літве, запаўняеце дэкларацыю самастойна і пералічваеце адсотак на дабрачыннасць у партнёрскія ўстановы «Новай Беларусі». Аўтарызуецеся на сайце і дасылаеце скрын запоўненай дэкларацыі.
Крок другі
Атрымліваеце ліст з запрашэннем у закрытую суполку для фундатараў і фундатарак, дзе будзеце разам вырашаць, на што накіраваць агульныя грошы.
Крок трэці
Восенню вы прымаеце канчатковае супольнае рашэнне, куды пойдуць агульныя сродкі. І назіраеце, як вырашаецца абраная вамі праблема.
Інструкцыю па запаўненні дэкларацыі і іншыя падрабязнасці праекта можаце пабачыць на старонцы ініцыятывы.
Чытайце таксама:
Айцішнікі запусцілі лічбавую платформу «Новая Беларусь»
Каментары