Амерыканскі борт SPAR19 са спікерам Палаты прадстаўнікоў ЗША Нэнсі Пэлосі прызямліўся ў аэропорце Тайбэя на Тайвані.
Палёт Нэнсі Пэлосі на Тайвань ужо другі дзень складае галоўную міжнародную інтрыгу. Шмат абмяркоўваецца, і на ўсіх узроўнях, ці наважацца ЗША на такі выклік Кітаю, і як на гэта Кітай адрэагуе.
Незадоўга да прызямлення за рэйсам з Пэлосі сачылі на сэрвісе Flightradar24 каля 632 тысяч чалавек.
Хоць Кітай пагражаў выкарыстаць самалёты-знішчальнікі, пакуль што апрача грознай рыторыкі ён нічога не зрабіў. Толькі МЗС Кітая асудзіў візіт Пэлосі на Тайвань і выказаў супраць яго пратэст.
Візіт Пэлосі на Тайвань, на думку кітайскага МЗС, сур'ёзна парушае прынцып «аднаго Кітая» і палажэнні трох кітайска-амерыканскіх камюніке. Кітай заклікае ЗША не ўмешвацца ва ўнутраныя справы КНР і не патураць сілам, якія выступаюць за незалежнасць Тайваня.
Пэлосі ў заяве, распаўсюджанай прэс-службай палітыка, падкрэсліла, што яе візіт на Тайвань не супярэчыць палітыцы ЗША ў дачыненні да Кітая. Ён, маўляў, з'яўляецца «сведчаннем прыхільнасці ЗША да падтрымкі тайваньскай дэмакратыі». Пры гэтым яна заявіла, што ЗША працягваюць выступаць супраць аднабаковых спроб «змяніць статус-кво» па пытанні Тайваня.
Самалёт Пэлосі суправаджалі амерыканскія знішчальнікі і авіяносцы. Перад гэтым днём некалькі кітайскіх вайсковых самалётаў праляцелі блізка да сярэдняй лініі, якая падзяляе Тайваньскі праліў, а вайсковыя караблі праплывалі ўшчыльную да неафіцыйнай лініі размежавання, паведамляў Reuters са спасылкамі на крыніцы.
Каментары
...and the rest of the planet Earth.