Брук і лісток. Паглядзіце, які помнік паставілі на магіле гродзенскага «Свістуна» ФОТЫ
Гродзенскі камнеапрацоўчы завод за ўласныя сродкі вырабіў і усталяваў помнік на магіле вулічнага музыканта Станіслава Сямінскага, вядомага ў Гродне як «Свістун». Ён быў легендай гродзенскіх вуліц і памёр у поўнай адзіноце, паведамляе Mostmedia.io.
Да самай смерці «Свістун» вёў бадзяжніцкі лад жыцця і граў на вуліцах Гродна. Музыка памёр 13 студзеня 2021 года, хавалі яго на гарадскіх могілках «Аульс» за кошт дзяржавы.
Пасля смерці «Свістуна» гродзенцы хацелі сабраць сродкі на помнік музыку, але за рэалізацыю ўзяўся Гродзенскі камнеапрацоўчы завод. Прадпрыемства за свой кошт вырабіла і ўсталявала помнік на магіле музыкі.
Лісцік ліпы — любімы «інструмент» Станіслава.
— Мы вырашылі сваімі сіламі увекавечыць памяць годнага чалавека. Аператыўна распрацавалі макет будучага помніка і неўзабаве пачалі рэалізацыю ў цэхах завода, у вёсцы Пушкары. Пасля доўгай зімы гліністая глеба «Аульса» нарэшце дазволіла завяршыць мантаж памятнага комплексу. У выніку атрымаўся прыгожы манумент з некалькіх відаў каменю. Асобна хочам адзначыць лісток ліпы, зроблены на высокадакладным станку з суцэльнага натуральнага каменю піраксеніт. Чаму лісток ліпы? Гэта быў любімы «інструмент» Станіслава, па яго словах, ён найбольш ярка перадаваў мелодыі. Брук пад лістком асацыюецца з брукаваннем некаторых вуліц цэнтра Гродна.
Ну а сама «легенда» горада стаіць на на фоне фарнага касцёла на Савецкай плошчы, дзе часцей за ўсё бачылі «Свістуна», гаворыцца ў паведамленні прадпрыемства.
Станіслаў Сямінскі пачаў граць на вуліцах Гродна ў 1990-х. Выступаў на незвычайным «інструменце» — лістках дрэў. Ён быў адзіным у Гродне, хто так добра граў на лісці. «Граць можа любы, але выводзіць мелодыю можа не кожны. Я граю рамансы і танга», — казаў у 2017 годзе музыка пра сваё хобі.
Цяпер чытаюць
Сілавікі сцвярджаюць, што затрымалі двух мужчын за галасаванне на выбарах у КР. Але ці можна гэтаму верыць?15
Каментары