Міністр інфармацыі Ігар Луцкі пайшоў на павышэнне — цяпер ён галоўны ідэолаг краіны
Новым міністрам інфармацыі прызначаны Уладзімір Пярцоў.
Луцкі займаў пасаду міністра інфармацыі з чэрвеня 2020 года, замяніўшы на пасадзе Алеся Карлюкевіча.
Яго кіраванне запомніцца ўдушэннем недзяржаўных СМІ. Больш за 400 журналістаў былі затрыманыя. 12 застаюцца ў турмах па крымінальных справах пры ўхвальным маўчанні міністэрства. «Напэўна, ёсць за што», — адказаў ён на пытанне, як ставіцца да прысуду журналісткам «Белсата» Кацярыне Андрэевай і Дар'і Чульцовай.
Увосень Tut.by быў пазбаўлены статусу СМІ, ад жніўня найпапулярнейшыя газеты «Народная воля» і «Камсамолка» перасталі друкавацца ў Беларусі, а ў другой палове года некалькі рэгіянальных СМІ спынілі папяровы выхад.
Нарэшце, у сакавіку 2021 года рэпрэсіі распаўсюдзіліся на неграмадска-палітычныя беларускамоўныя выданні. Часопісы «Наша гісторыя», «Дуду» і «Асцярожна: дзеці!» былі выгнаныя з дзяржаўных сетак распаўсюду, запалоненых расійскімі аналагамі гэтых публікацый.
Луцкі стаў намеснікам кіраўніка Адміністрацыі прэзідэнта па ідэалогіі, а новым міністрам інфармацыі стаў Уладзімір Пярцоў. Да апошняга часу ён кіраваў прадстаўніцтвам тэлерадыёкампаніі «Мір» у Беларусі.
Цяпер чытаюць
«Я хачу справядлівасці — і для жанчын, і для сябе». Шчырая гутарка з Андрэем Стрыжаком пра скандал з дыкпікамі, залежнасці і будучыню50
Каментары