Улады ўсталявалі мемарыяльную шыльду ў «Аршанскіх Курапатах» ФОТА
На помніку-камені, які адзначае месца масавых расстрэлаў ва ўрочышчы Кабыляцкая гара пад Воршай, зьявілася шыльда са словамі «Месца памяці і смутку». Сваякі рэпрэсаваных прасілі, каб на шыльдзе быў тэкст «Памяці ахвяр палітычных рэпрэсій», але ў Аршанскім райвыканкаме на гэта не пагадзіліся, піша Радыё Свабода.
Падчас абмеркаваньня ўдзельнікі ініцыятывы «Кабылякі. Расстраляныя ў Воршы» даводзілі мясцовым уладам, што надпіс варта зрабіць на чатырох мовах: па-беларуску, па-расейску, па-польску і на іўрыце — зважаючы на тое, што сярод расстраляных былі пераважна беларусы, расейцы, палякі ды габрэі. Але ў канчатковым варыянце польскую мову замянілі на ангельскую, патлумачыўшы гэта тым, што яна больш пашыраная.
Сваякі расстраляных пад Воршай лічаць, што ўсталяваньне шыльды — гэта крок да прызнаньня факту сталінскіх рэпрэсій. Хоць падобныя факты ў сучаснай Беларусі найчасьцей замоўчваюцца — гэтак не прызнаным уладамі застаецца месца масавых расстрэлаў каля вёскі Хайсы пад Віцебскам. Але некаторых абурае «безаблічнасьць» надпісу, зь якога немагчыма зразумець, пра які «смутак» і пра якую «памяць» у ім ідзе гаворка.
Цяпер чытаюць
Сілавікі сцвярджаюць, што затрымалі двух мужчын за галасаванне на выбарах у КР. Але ці можна гэтаму верыць?18
Каментары