Кіраўніцтва магазіна «Талін» абвяргае інфармацыю аб рэйдарскім захопе

Кіраўніцтва ЗАТ «Магазін Талін» заяўляе, што інфармацыя, прадстаўленая журналістам былым дырэктарам гандлёвага прадпрыемства аб яго рэйдарскім захопе, не адпаведае рэчаіснасці. Аб гэтым гаворыцца ў лісце, што паступіў у БелаПАН.

«Гэтая інфармацыя не адпавядае рэчаіснасці, а таксама ганьбіць годнасць і дзелавую рэпутацыю цяперашняга кіраўніцтва ЗАТ «Магазін Талін», — гаворыцца ў лісце.

У дакуменце паведамляецца, што адміністрацыя прадпрыемства мае шэраг дакументаў, якія абвяргаюць звесткі, распаўсюджаныя былым дырэктарам Віктарам Янушковым.

«Па-першае, ёсць шэраг набыўшых моц рашэнняў суда, якімі прызнаецца законным валоданне акцыямі цяперашнімі акцыянерамі, а таксама законнасць звальнення Янушкова Віктара і прызначэння новага дырэктара прадпрыемства», — гаворыцца ў лісце.

Кіраўніцтва гандлёвага прадпрыемства падкрэслівае, што дзеянні цяперашняга ўладальніка акцый не маюць нічога агульнага з праявамі рэйдарства.

«Цяперашні ўладальнік кантрольнага пакета акцый ЗАТ „Магазін Талін“ набыў іх праз прапановы старым акцыянерам канкурэнтаздольнай цаны за акцыю, якая ў некалькі разоў перавышае раней прапанаваную. Цяперашняе кіраўніцтва не пагаршала фінансавыя паказчыкі прадпрыемства, не выводзіла актывы прадпрыемства з абароту», — гаворыцца ў лісце кіраўніцтва ЗАТ «Магазін Талін».

У лісце таксама паведамляецца, што былы дырэктар ЗАТ «Магазін Талін» быў звольнены з пасады па рашэнні агульнага сходу акцыянераў, і законнасць гэтага рашэння была пацверджана ў судовым парадку.

Аўтары ліста інфармуюць, што на працягу апошняга года былы дырэктар «выкарыстоўваў магчымасці працэсуальнага заканадаўства для зацягвання ўваходжання рашэнняў суда ў сілу. Гэта дазволіла яму такі доўгі час фактычна кіраваць прадпрыемствам без законных на тое падстаў, у тым ліку неправамерна атрымліваць заработную плату, выкарыстоўваць службовы аўтамабіль у асабістых мэтах».

Як паведамлялася раней, 24 чэрвеня падчас круглага стала ў Мінску былы дырэктар ЗАТ «Магазін Талін» Віктар Янушкоў заявіў аб рэйдарскім захопе прадпрыемства.

Каментуючы заяву Янушкова, кіраўніцтва прадпрыемства пацвярджае, што дзверы кабінета былога дырэктара сапраўды былі ўзламаныя.

«Дзверы ў кабінет былога дырэктара Віктара Янушкова сапраўды былі ўзламаныя, але ў мэтах выканання прынятых судом мер, а не самавольна, у прысутнасці сведак і прадстаўнікоў міліцыі для мэтаў атрымання паўнапраўным дырэктарам таварыства афіцыйных дакументаў, пячатак ЗАТ „Магазін Талін“ для выканання ім сваіх службовых абавязкаў. Гэтую меру прыйшлося скарыстаць з-за шматразовай адмовы нелегетымнага дырэктара Віктара Янушкова перадаць справы прадпрыемства новаму дырэктару (што ім не адмаўляецца і пацверджана матэрыяламі суда)», — падкрэсліваецца ў лісце кіраўніцтва ЗАТ «Магазін Талін».

У лісце таксама ўказваецца, што за год «неправамернага кіраўніцтва» Янушкова прадпрыемства фактычна «было даведзена да перадбанкрутнага становішча».

• 0
• 0
• 0
• 0
• 0
• 0
• 0
• 0