Źmicier Bandarenka: Ja nie pieražyŭ i sotaj častki taho, što Sańnikaŭ

Bandarenka prybyŭ na minski aŭtavakzał «Uschodni» a 14 hadzinie. Jaho sustrakali kala 60 čałaviek z kvietkami.

«Chrystos uvaskros! Vyzvaleńnie palitviaźniaŭ — heta dobry znak dla Biełarusi,— skazaŭ Źmicier, jak tolki pryjechaŭ u Minsk. — Chacia ŭ taki dzień pavinny być vyzvaleny ŭsie».

Pra vyzvaleńnie Sańnikava jon pačuŭ učora a 20-j hadzinie z radyjo «Svaboda». «Pieršaja maja dumka była: a mnie pryjdziecca čakać dva tydni da viartańnia pasłoŭ». Ale siońnia ranicaj pryjšoŭ namieśnik načalnika kałonii i zahadaŭ źbiracca z rečami. Bandarenka pierapytaŭ, jaho vyzvalajuć ci pieravodziać na etap.

«U taki dzień nichto nie staŭ by vas padmanvać», — adkazaŭ turemščyk.

Nahadajem, siońnia pravasłaŭnyja śviatkujuć Uvaskrasieńnie Chrystova.

Źmicier Bandarenka dvojčy padkreśliŭ, što nie pieražyŭ za kratami i sotaj častki taho, što vytrymaŭ Andrej Sańnikaŭ. Jon adznačyŭ, što kali b viedaŭ, što Sańnikaŭ napisaŭ prašeńnie ab pamiłavańni ŭ listapadzie, i svajo prašeńnie byŭ napisaŭ by raniej.

Jon raskazaŭ, što jaho sprabavali zavierbavać jašče ŭ turmie KDB.

KDBisty patrabavali ad jaho cichaha kantrolu nad sajtam «Chartyja'97», a taksamy admovy ad redahavańnia kamientaroŭ na sajcie.

«Takim čynam, ja paciarpieŭ za cenzuru», — pažartavaŭ jon. Bandarenka zajaviŭ, što nie źbirajecca admaŭlacca ad svajoj papiaredniaj dziejnaści. «Hramadzianskuju dziejnaść budu praciahvać. Chaciełasia b, kab kraina stała svabodnaj».

Vyhladaje Bandarenka narmalna.

* * *

Pa słovach žonki Źmitra Volhi, muža vypuścili z Mahiloŭskaj kałonii siońnia dzieści a 9.15 ranicy. Padrabiaznaściaŭ jana nie viedaje. Ciapier Bandarenku viazuć na maršrutcy ŭ Minsk. Pa infarmacyi charter97.org, Źmicier jedzie ležačy praz prablemy sa śpinoj.

Źmicier Bandarenka prybudzie na Uschodni aŭtavakzał u 13.20-13.30.

Sustreć jaho sabrałasia kala 50 čałaviek. Siarod ich jahonaja žonka, jakaja ŭvieś hety čas zmahałasia za vyzvaleńnie muža, Andrej Sańnikaŭ i Iryna Chalip z Danikam, a taksama baćki Iryny Chalip.

Sańnikaŭ skazaŭ, što trochi ździŭleny: u niadzieli zvyčajna nie vyzvalajuć.

Źmitra Bandarenku asudzili na dva hady kałonii za ŭdzieł u akcyi pratestu 19 śniežnia 2010. Jon źjaŭlaŭsia davieranaj asobaj Andreja Sańnikava na minułych prezidenckich vybarach. Za kratami jon pieranios dźvie apieracyi. U lipieni 2011 h. jamu rabili apieracyju na chrybietniku, vydalali mižpazvankovuju hryžu. U pačatku krasavika jamu vydalili na nazie absces, jaki ŭtvaryŭsia ad padahry.

Prašeńnie ab pamiłavańni palitviazień napisaŭ 1 lutaha.

14 krasavika na svabodu vypuścili Andreja Sańnikava.

Praciah budzie.

• 0
• 0
• 0
• 0
• 0
• 0
• 0
• 0