Jaho hieroi — padletki i histaryčnyja asoby.
Ksienii Štalankovaj ciapier 19 hadoŭ. A svoj pryhodnicki raman «Advarotny bok lustra» napisała, kali jašče vučyłasia ŭ škole.
Chto paśpieŭ pračytać knihu, nazvali jaje admietnaj padziejaj u ajčynnaj litaratury,
niahledziačy na peŭnyja techničnyja chiby. Maładaja aŭtarka raskazała pra svoj debiutny raman.
«NN»: Vy napisali knihu ŭ 16 hadoŭ?
Ksienija Štalankova: U 16 źjaviŭsia kančatkovy varyjant. A pisała ź pierapynkami dzieści čatyry hady. U škole na ŭroku biełaruskaj litaratury niejak prapanavali napisać apaviadańnie albo pačatak ramana. Tady ŭspłyła takaja historyja, źjavilisia hieroi. I pačała pisać.
«NN»: Čamu dla ramana abrali časy Barbary Radzivił i Bony Sforcy, jakich taksama ŭviali ŭ tvor?
KŠ:
Tym pieryjadam ja zacikaviłasia praz knihu Vitaŭta Čaropki «Uładary Vialikaha kniastva»,jakaja trapiła da mianie ŭ 12 hadoŭ. Chaciełasia dakranucca taho času i ŭ svajoj knizie.
«NN»: Heta była pieršaja litaraturnaja sproba, jakaja vyrasła ŭ ceły raman?
KŠ: Heta była pieršaja sproba, jakaja pabačyła śviet. Ja rana pačała čytać i mnie daŭno samoj chaciełasia pisać — prydumvać niejkija historyi.
«NN»: Vy zapłanavali staryć tryłohiju. Praciah hatovy?
KŠ: Ja ciapier pracuju nad druhoj častkaj. Spadziajusia, za leta dapišu i vosieńniu zmahu prapanavać čytaču.
«NN»: Raman «Advarotny bok lustra» niekalki hadoŭ pralažaŭ u vydaviectvach. Čamu jaho nie chacieli drukavać?
KŠ:
Heta była ryzyka dla vydaviectvaŭ: ja była maleńkim dziaŭčom, nikomu nieviadomym. Paŭstavali i pytańni z dalejšaj realizacyjaj knihi — heta pytańnie hrošaj.
«NN»: Kniha tolki niadaŭna vyjšła, a ja ŭžo sustrakaŭ stanoŭčyja vodhuki na jaje ŭ internecie. Vy znajomyja z reakcyjaj pieršych čytačoŭ?
KŠ: Tak. Niechta kaža, što prosta «prahłynuŭ» knihu. Takoje, kaniečnie, pryjemna čuć. Bo ja nie viedała, jakoj reakcyi čakać. Niechta prapanuje idei dla nastupnych knih. Jość i krytyčnyja zaŭvahi.
«NN»: Jak małady aŭtar, jak ličycie, dla moładzi pavinny pisać adnahodki, albo i darosłyja piśmieńniki spraŭlajucca z hetym taksama dobra?
KŠ: Tut niama niejkaha kryteryja. Dobraja litaratura nie zaležyć ad uzrostu.
Nabyć knihu možna tut.
Advarotny bok lustra / Ksienija Štalankova. — Minsk: Łohvinaŭ, 2012. — 192 s.
Ciapier čytajuć
Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty23
Kamientary