U Japonii zmahajucca ź miadźviedziami pry dapamozie «vaŭkoŭ-monstraŭ» z čyrvonymi vačyma
Na fonie biesprecedentnaha rostu kolkaści napadaŭ miadźviedziaŭ na ludziej u Japonii pačali aktyŭna vykarystoŭvać niezvyčajnyja technałohii. Kab zaścierahčy nasielenyja punkty i sielskahaspadarčyja ŭhodździ ad ahresiŭnych drapiežnikaŭ, miascovyja inžyniery raspracavali śpiecyjalnych robataŭ-vaŭkoŭ, jakija svaim žachlivym vyhladam i hukami prymušajuć žyvioł trymacca dalej ad čałaviečych pasieliščaŭ. Popyt na takija pryłady raście nastolki chutka, što vytvorcy ŭžo nie paśpiavajuć ich źbirać.
U apošnija hady kolkaść sustreč čałavieka ź miadźviedziem u Japonii dasiahnuła histaryčnaha maksimumu. Jak piša Tagesspiegel sa spasyłkaj na AFP, tolki za apošni hod u krainie zafiksavali bolš za 50 tysiač vypadkaŭ źjaŭleńnia drapiežnikaŭ pablizu nasielenych punktaŭ — heta bolš čym udvaja pieravyšaje pakazčyki dvuchhadovaj daŭniny. Miadźviedzi ŭsio čaściej zachodziać u harady i vioski, źjaŭlajucca kala škoł, supiermarkietaŭ i papularnych turystyčnych miescaŭ.
Na hetym fonie rezka vyrasła i kolkaść žyvioł, jakich adłoŭlivajuć i zabivajuć. Za apošni hod u Japonii źniščyli 14 601 miadźviedzia — heta ŭtraja bolš, čym raniej. Pavialičvajecca i kolkaść čałaviečych achviar: za hod ad napadaŭ miadźviedziaŭ zahinuli 13 čałaviek, što stała novym sumnym rekordam dla krainy.
U adkaz na rost kolkaści niebiaśpiečnych sustreč japonskaja kampanija Ohta Seiki z vostrava Chakajda prapanavała niezvyčajny sposab adpužvańnia drapiežnikaŭ — robata pad nazvaj «Voŭk-monstr».
Pryłada, pakrytaja kałmatym futram, maje čyrvonyja śviatłodyjodnyja vočy, jakija śvieciacca ŭ ciemry, i mahutnyja dynamiki. Robat zdolny vydavać bolš za 50 roznych hukaŭ — ad praniźlivaha vyćcia da čałaviečych krykaŭ i elektronnaha šumu, jakija čuvać na adlehłaści da kiłamietra.
Kiraŭnik kampanii raskazaŭ žurnalistam, što popyt na takich robataŭ ciapier rekordny. Z pačatku hoda ŭžo atrymana kala 50 zakazaŭ — raniej stolki kuplali za ceły hod.
Košt adnaho «vaŭka-monstra», abstalavanaha datčykami ruchu, batarejami i soniečnymi panelami, składaje kala 3400 jeŭra. Niahledziačy na vysoki košt, zakazy pastupajuć z usioj krainy — ad fiermieraŭ da ŭładalnikaŭ holf-kłubaŭ. Robaty źbirajucca ŭručnuju, tamu vytvorcy ŭžo nie paśpiavajuć zadavalniać popyt, a pakupnikam davodzicca čakać pastaŭki pa niekalki miesiacaŭ.
Cikava, što, kali ŭ 2016 hodzie raspracoŭka była ŭpieršyniu prezientavana, mnohija ŭspryniali jaje jak dziŭnuju cacku abo zabaŭku. Adnak ź ciaham času pryłada dakazała svaju efiektyŭnaść i siońnia pieratvaryłasia ŭ paŭnavartasny instrumient biaśpieki.
Ciapier kampanija pracuje nad novaj viersijaj robata — na kołach. Płanujecca, što takaja madel zmoža samastojna pieraśledavać žyvioł abo patrulavać zadadzienyja maršruty.
Pamiatajecie paru studentki i vykładčyka duchoŭnaha vučylišča, jaki starejšy za jaje na 31 hod? Jany raźbiehlisia3
Pamiatajecie paru studentki i vykładčyka duchoŭnaha vučylišča, jaki starejšy za jaje na 31 hod? Jany raźbiehlisia
Elektronnuju «Biełaruskuju encykłapiedyju», stvoranuju jak prastoru «vierahodnych viedaŭ pra Biełaruś», cicha likvidavali razam z redakcyjaj. Kupu artykułaŭ pieradali Hihinu77
Kamientary