Joj nie baluča

Mnie nie bolno

Raspuśnik

BT, 22.05

Mnie nie baluča (Mnie nie bolno)

Rasieja, 2006, kalarovy, 104 chv.

Režyser: Alaksiej Bałabanaŭ

Roli vykonvajuć: Renata Lićvinava, Alaksandar Jacenka, Dźmitry Dziužaŭ, Mikita Michałkoŭ, Inha Abołdzina, Siarhiej Makaviecki

Žanr: Meladrama

Adznaka: 7,5 (z 10)

Alaksiej Bałabanaŭ – prarok patajemnych žadańniaŭ rasiejskaje publiki i jejnych samych hłybinnych kompleksaŭ. Pierabudovačnaja kałatnieča adbivałasia ŭ filmach pavodle Kafki j Bekieta, ksenafobski «Brat» papiaredničaŭ pucinskaj eposie, imperski patryjatyzm «kiravanaje demakratyi» znajšoŭ svajo miesca ŭ «Vajnie». Daścipnaja meladrama «Mnie nie baluča» pradkazvaje novaje raźvitańnie.

Utrymanka novaha rasiejca Nateła spakusiła maładzieńkaha dyzajnera Mišu. Miša zakachaŭsia ŭ Natełu pa samyja vušy, ale ŭ hieraini jość svaja balučaja tajna.

Bałabanaŭ łamaje imperska-bravurnuju tradycyju j adychodzić ad biazdumna-falšyvych meladramaŭ «naftavaha» času. Hieroi karciny nie makiety «ščaścia», a žyvyja ludzi. Pakutliva-dziŭnaja Renata Litvinava ŭ roli Nateły, kłapatlivy Alaksandar Jacenka (Miša) i navat «novy rasiejec» Michałkoŭ – ščymliva-razhubleny. A kosnajazykaja architektarka (Inha Abołdzina-Strałkova) i liryčny Dźmitry Dziužaŭ – heta admysłovyja truki.

Kožny z hierojaŭ niešta hublaje, bo hierainia sychodzić. Dziŭnaja Nateła hublaje žyćcio – i Renata Litvinava nie baicca padacca strašnaju, parcalanavaj. Architektarka hublaje Radzimu, hieroj Miša – kachanuju. Usie razam hublajuć supolny los – i jon užo nia budzie cukierna-falšyvym dyj palityčna adlakavanym.

Ale nam nie baluča. Karcina nievierahodna śvietłaja j praniźlivaja. Hustoŭna padabranaja zakadravaja muzyka, praŭdzivaja aktorskaja hulnia dy intanacyi novaha raźvitańnia – dla novaj i nieviadomaj sustrečy.

NTV, 22.40

Raspuśnik (Libertine)

Vialikabrytanija, 2004, kalarovy, 130 chv.

Režyser: Łorens Danmar

Roli vykonvajuć: Džoni Dep, Samanta Mortan, Džon Małkavič, Ryčard Kojł, Rupert Frend, Śjuzan Hoślinh Valeryjo, Tom Hałander, Kara Horhan

Žanr: Histaryčnaja drama

Historyja paeta-raspuśnika Džona Ŭiłmata — hrafa Ročestera i favaryta Čarłza II. Paet pražyŭ karotkaje (30 hadoŭ), ale nadta burnaje žyćcio dy zasłužyŭ słavu skandalista. Adnak nieŭtajmavanaja ciaha da paluboŭnych avanturaŭ padarvała jahonyja siły. Skandalist pamior ad prancaŭ, choć mieŭ usie šancy skanać ad alkahalizmu.

Hałoŭny atrakcyjon karciny Łorensa Danmara — Džoni Dep u hałoŭnaj roli, jaki zaŭsiody vykštałcona hraŭ ludziej dziŭnych, marhinalna-nervovych. Edvard — ruki-nažnicy, bajaźlivy kanstebl Krejn, pirat Vierabiej, transseksuał ci ahient kubinskaje dziaržbiaśpieki.

Raspuśnik časoŭ Aśvietnictva praciahvaje tradycyju maralna-vyčvarnych persanažaŭ. Dž.Ŭiłmat — cynik i ateist, jaki žyvie dla siabie, i ŭ hetym jahonyja žaleznyja pryncypy. Ale za niastrymanym hiedanizmam chavajecca čujnaja spakutavanaja duša. «Ci ja vam padabajusia? Ci ja vam padabajusia?» — z nadziejaj šepča hieroj Džoni Depa, kab šakavać hledačoŭ hniłoju syfilityčnaj maskaj.

Zastajecca dadać, što Čarłza II syhraŭ Džon Małkavič.

Usie filmy

• 0
• 0
• 0
• 0
• 0
• 0
• 0
• 0